قبل الفجر يرسم علامة الطلوعي
والناس كلن جاه نومه وشاله
والنوم رحمة رب ماهو قطوعي
كم واحد نومه تنحى وجاله
في ليلة بطراف حره وقوعي
جالن عليه ومنهن الشعر جاله
كن القمر للشرق يبغى الرجوعي
نفسه نبي الرجعه وصارت محاله
شكله تقول إنه يهل الدموعي
يشكي من النقصان بعد اكتماله
ماله من الفزعات توجد فزوعي
وشرقه تنكرله وهو جنب جاله
اما الجنوب يقول مالك سنوعي
عندي ولا لك بالشمال وشماله
وتعاطفت معه المشاعر بطوعي
علي كنه يشتكي ما جراله
وانا بعد مثله قليل سنوعي
وما يختلي بالنفس كنه دراله
عشر دقايق ثم يبدا النزوعي
ومن حالتن يطلع ويدخل بحاله
وعلامته لصدلأمر الخضوعي
تلونه في لونها البرتقاله
حتى توارى مع ظلامن يروعي
الله يعقله ليلة من لياله
واثره خيال راح تسعين بوعي
فوق الغلاف وجاذبية خياله
اثره على تسخير ربه قنوعي
واللي بالي غير واللي باله
وهللت واستغفرت كلي ركوعي
وسجودي للي كلفه بالرساله
وجر قلبن لاذ بين الضلوعي
قلت القمر وش دخلك في مجاله
حتى الكواكب ياقليل النفوعي
دخلت معها في عواطف ظلاله
ياقلب انا مبغاك قلبن شلوعي
تشلع على ادنى الطاري اللي طراله
ياقلب انا مبغاك قلبن جزوعي
تجزع من شي ماينجزع ومالك وماله
ياقلب انا مبغاك قلبن قطوعي
ابيك تخشى الله جل جلاله
ماتشوف عمرن راح كنه اسبوعي
على كثر صكات بقعا بجاله
ياقلب انا ماني ضعيف هلوعي
وكلن عن الثاني يروح بفاله
من مسني في خير ماني منوعي
اقول شكرا جمل الله حاله
ومن مسني في شر ماني طقوعي
ويبين لا ركب الرسن في المحاله
الشاعر / عبدالله باتل الرشيدي