لا تسل عن ضيقـة ايامـي وقلبـي لا تمـره
ضاعت دروبك على اخر ليل وجروحي عطايب
وان لمحت اسمي ترفّـق بـه وبادلـه المبره
كثر مابادلك شوق وكثـر مـا ودّعـك هايـب
لك على يمة عروق القلـب يالمغـرور جره
ماتواريهـا السنيـن ولا تغيـرهـا النـوايـب
والله ان قربك يسر الـروح وفراقـك مضـره
وأنت علّة خافقي وأنت القريب مـن القرايـب
ماقدرت اتوب عن ذكرك وعن حلـوك ومـره
ليه عن ذبح الغلا ياصاحبـي مانتـه بتايـب؟
هـاك ميـزان الجـروح وقيسهـا ذرة بـذرة
ماوزنت الا غـلاك ولا طعنـت الا الحبايـب
كل مايطري علي ظلمـك تشـب الكبـد حـره
كن في صدري رماح القوم وسيوف وحرايـب
كيف ابنسى ليلة زعزعـت قلبـي مـن مقـره
انفرت كبدي وخفاّقـي غـدا قبـر ونصايـب
هلـت دموعـي وحلّفتـك بربـك الـف مـره
يابن آدم خف من الله مـاورا ذبحـي كسايـب
أنت شخصٍ ماقدرت استوعبـه خيـره وشـره
من عرفتك والدموع دمـوع والخفـاق ذايـب
لا تصدق كذبـة الايـام فـي وجـه المسـره
بسمة في عين طفل ودمعة فـي عيـن شايـب
وان تذكرت الهنوف اللي على صوتـك تشـره
ضمها في صدرك الموحش وعرّضه الهبايـب
انكسر حلم الليـال وطاحـت نجـوم المجـره
أبتدت شمس وتوارت شمس وجروحي عطايب
وأنـــــــــــــــــــــت
أنــــــــــــــــــــــت
انت ماتـدري ولاعنـدك مـن الاحسـاس ذرّه
أشهد ان مصيبتى بك من عظيمـات المصايـب