الحمد لله والثنا والفضل=سبحان من لانحصي أفضاله
المطًلع سامع دبيب النمل=مانستذل ونخضع إلا له
سلام ياديرة كرام الأصل=ماناض برق وعسكر خياله
وماسال بأهداب الصبايا كحل=ومانشًد الطرقي عن أحواله
ياأبوظبي ياأم العيون النجل=يارمز حلم العود وعياله
قمتي على لمًة بصير وشمل=وطلتي مكانٍ ماأحدٍ طاله
ياهل ترى يابو ظبي ياهل=باقي فخر ماأنتي على باله
شعبك على الفطره وساسك عدل=وأنتي بهالثنتين مختاله
تبختري مالك شبيه ومثل=دانة خليج وعشق خياله
أما بعد يادار وأما قبل=طاب القصيد وطاب مواله
الشعر رعشة مهرجان الحفل=يلمع بجيد الليل سلساله
والشعر مبدأ وألتزام ومثل=والشاعر اللي يحمل رساله
أما يجي قبل القصايد رجل=والا يسيب الشعر لرجاله
والشعر يهدى للكريم الجزل=وأنا زبون الشعر وجزاله
أخف بأوزانه وأزيده ثقل=وأمشلحه وأنكس عقاله
حتى يجي واثق خطى ويظل=واثق خطى ماينهزع جاله
يليق في قامة سمو النبل=محمد الزايد ويرقى له
شيخ على طيب المكارم جبل=متعلي قدره ومنزاله
سمح صعيب مستحيل سهل=مافيه عز ماتهياله
اليا تعزوى صيرميٍٍ زحل=وليا برك للحمل يشتاله
وان صار بالحزات نقض وفتل=ينقض بريم مفتل حباله
أما بعد يادار وأما قبل=طاب القصيد وطاب مواله
ضيف الشرف ريض غلاه وعجل=حاول يبين لك على عجاله
أنه هنا مابين ربع وأهل=وأنك هنا بالقلب نزاله
مساعد الرشيدي