معاناة غزه
اللهم انصرهم بنصر ٍ من عندك
ياغزّه أحنا ماصحينا من النوم=للحين وأحنا فيه نحلم ياغزّه
وحلومنا ماهيب مثل أيّة حلوم=حلومنا ذلّ ٍ عجزنا نعزّه
ستين عام جروح وأحزان وهموم=ونكبه وتغريبه ونكسه وهَزّه
لاعاد ترجين العرب وألقي اللوم=على تخاذلهم تجاه المعزّه
وعيشي على ذكرى الزمن وأذكري دوم=(صلاح الايوبي) بمجده وعِزّه
بالماضي أهلكنا هل الفرس والروم=واليوم مانقدر علمنا نرزّه
ماهو مهمّ نكون شجعان وقروم=أهمّ شيّ نكون كشخه ورزّه
وماهمّنا (القدس) إن سقط في يد القوم=والمشكله مافيه أحد نستفزّه
حكامنا مافيهم أيّات زيزوم=ولافيهم اللي للوغى يفزّ فزّه
ولافيهم اللي ((فكّر)) لنصرك يقوم=ولافيهم اللي ((ماجرالك)) يهزّه
مايليّن أقساهم ويجعلْه مهزوم=إلاّ { عنود ٍ } ردفها له تهزّه
مير أطلبي ربّ ٍ له عباده تصوم=وإرجيه نصر ٍ منه في كلّ حزّه
ويالله ياخالق سماء وأرض ونجوم= هوّن على غزّه معاناة غزّه
عبدالله عوجان