السلام عليــكم ورحمة الله وبركاته.....,,
أمــا بعــد..,,
فحبيـــت ان اضع بين ايديكم احد الرديات الجميــلة بين الشاعرين
عيد بن عوض بن مربــح الرشيدي
و
تركي بن عبدالله الشدادي الحارثي
ياراكب اللي فوقـه الخـرج منشـور=يزهاه مـن شغـل العـذارى فنونـه
تشدي ظليـم مرتعـه نايـف القـور=متـذيـر ٍ قناصـتـه يخـبـرونـه
تجفل ليا اوحت فوقها يصـرخ الكـور=وان حسها الراكـب تفـرج حزونـه
من سيف جده سجهـا طلعـة النـور=واحفظ جوابـي ليـن تلفـي زبونـه
ملفاك من يروي شبـا كـل مشـذور=يـوم الملاقـا لابـتـه يشكـرونـه
تلقاه في بيت ٍ علـى العـز معمـور=على الكـرم والجـود شيـد ركونـه
الشاعر اللي هاجسـه يغـرق بحـور=بنـات فكـره لانـطـق ماتخـونـه
تنقاد له جزل المعانـي علـى الفـور=كن الجواهـر فـي حشـاه مخزونـه
كنـه علـى خيـرة قوافيـه مامـور=بالشعـر يامـا يطربـنـي لحـونـه
نخيـت قـرم ٍ بالمواجيـب مذكـور=رايه نبـا عبـر الصحـف ينشرونـه
اشكي لابن مربح خلف كـل منعـور=الحال عقـب الزيـن قفـت ظعونـه
ياعيد قلبي من هوى البيض مسمـور=والدمع مثل الغيـث لاارهـت مزونـه
حالي بعد فرقا الغضي قايد الحور=حالة غريق ٍ يلعب الموج دونه
عليه جرحي داخـل القلـب محفـور=ماله عـلاج وشفـت منـه المهونـه
جرح ٍ علاجه حـار بـه كـل دكتـور=عجـزوا دكاتـرت الهـوى ياجدونـه
قالو علامـك قلـت يالربـع مسحـور=في حـب مـن ياعزوتـي تجهلونـه
راعي جبين ٍ في دجى الليل لـه نـور=تنكب كيانـي نظـرة ٍ مـن عيونـه
رمشه ليا اغضى به على الخد مسطور=يتـل بـه قلبـي وتكثـر شطـونـه
ونهده كما التفـاح بالصـدر مزبـور=ومثل البرد بيـن الشفايـف سنونـه
يابـو جديـل ٍ كنـه الليـل منـثـور=ياعـود مـوز ٍ ناعمـات ٍ غصونـه
كانـت ليالينـا معـه كلهـا بــدور=واليـوم مافيهـا قـمـر يذكـرونـه
اربع سنيـن وفوقهـا عـدة شهـور=نسبـح بلـذات الـغـرام وجنـونـه
حب ٍ على وضح النقا فـوق مشهـور=على شرف وعـن الرذيلـه نصونـه
ايام كانـت لـي معـه ورد وزهـور=قبـل الـعـواذل حبـنـا يعرفـونـه
واليوم وقفوا دونهـا اعـداي طابـور=ولاانفـك بـاب لوصلنـا يغلقـونـه
من بعد ماكانت لنـا افـراح وسـرور=عجزوا مراسيـل الهـوى ياصلونـه
اقفى هوى بالي على البعـد مجبـور=عن وصلنا اشـرار المـلا يمنعونـه
بعد بنت في قلبـي ابـراااج وقصـور=ناويـن اهلهـا مابنـت يهدمـونـه
طاعوا بنـا نقالـة الحكـي والـزور=نـاس ٍ هدفهـم شملـنـا ينكبـونـه
واضحك وانا قلبي من الغيض مفجور=واجحـد صوابـي واتحمـل طعونـه
واقـول خلـو كـل ماصـار مستـور=وقولوا لها اني بخير ياللـي تجونـه
مابيييه يتكـدر ولـو عشـت مقهـور=عـن حالتـي تكفـون لاتخبـرونـه
قلب ٍ عجز في حبها يسمـع الشـور=ماطـاع فيهـا كـل مـن يعذلـونـه
امسى كما قصر ٍ من الناس مهجـور=العنكبـوت معشعـش ٍفـي ركـونـه
خافوا به الله ياهـل الظلـم والجـور=لـو هـم يهـود اظنهـم يرحمونـه
الرد
عيـــد بن مربــح الرشيدي
ياراكب اللي فوقه الخـرج منشـور=عليه مـن شغـل العـذارى فنونـه
اشعل شناح ايديه ماتلمـس الـزور=فـج العضـود موسعـاتٍ متـونـه
الفخـذ قطمـا والاذن راس كافـور=وعينه تقل جمـر ٍ هلـه ينفخونـه
ناب الفقار وذيله أشقـر ومحشـور=مايميزونـه غيـر مـن يقربـونـه
والبطن كنه مـن شوايـاه ممخـور=دايـم مهجنـة الهجـن يدرجـونـه
وحبل بطانه تسعة اشبـار مشبـور=مقلـوز ٍ يعجبـك شكلـه ولـونـه
يسرح من الخفجي زبد صدره يفـور=يشـدى غـزالٍ بالسلـق يطردونـه
وعليـه عبسـي ٍ محنـك وممـرور=الـدرب مايحتـاج مـن ياصفونـه
زهيبـه بـر ٍ مطحـن ومـصـرور=ودهن وتمر مـن الفصـم ينظفونـه
والماء بشنه والعصا عـود باكـور=وكلاش فيـه المحرقـات مخزونـه
صبح اربع ٍ مقفن من الخبت بحدور=قدمـه بجـده لابــة ٍ يحتـرونـه
عند الشدادي حط خرجـه ومشكـور=سلم على خشمـه بلطـف وليونـه
مد الجواب وقلـه الوضـع مقـدور=مـن ظـن فينـا مانخيـب ظنونـه
مـده لقـرم ٍ لاتكبـر ولا غــرور=ريف الضيوف اللي عشاهـم يبونـه
راعي صحون ٍ وسطها يصبح السور=يضحون تالي زادهم فـي صحونـة
تركي ليـا منـه هبـا كـل مثبـور=عز القصيـر وعـز مـن يزهمونـه
من لابة ٍ وسـط الجزيـرة لهـا دور=الطيب في غالـي الثمـن يشترونـه
حـوارث ٍ وافيـن مافيهـم قصـور=المجـد يارثهـم وهـم يارثـونـه
واللي مثل شـرواه ماعنـه مذخـور=حق ٍ علـي مشاركـه فـي غبونـه
ماجور ياريـف المساييـر ماجـور=بشر بجاهـي والسلـف والمعونـه
ياعاشق ٍ في سكرة الحـب مغمـور=عضيض غلـث ٍ وافيـات ٍ حتونـه
يعول كما تعول خلوج ٍ مـن الخـور=شافـت ولدهـا قدمهـا يصلخونـه
عقب اروحت دمه على دمـه تـدور=مـا الله هداهـم بالزمـل يدفنونـه
ويقنب قنيب الذيب في راس عنقـور=ذيـب ٍ عيالـه بالعـوا يشحـذونـه
عدا وعود باشهـب الملـح منـزور=لولاه هـف مـع الشفـا يذبحونـه
الحب سهم ٍ يطعـن انـاث وذكـور=وتنتـج عنـه علـه بليـا سخونـه
ومع الغروب يصيب راعيه حاشـور=يقرا آية الكرسي وترقـص سكونـه
لاشك في سلم العرب شبه محظـور=راعيـه لـو انـه بـري يتهمونـه
ويصير في نظراتهـم تقـل مجـدور=ما تقل ذاقـوا مـن مذاقـه نمونـه
قالوا به العشـاق كلمـات وسطـور=صوارم ٍ حـوض الـدرك ياردونـه
والعرض مثل البنك يحتـاج ناطـور=ولا يحسبون رجـال مـن يهملونـه
وحنا بجكم وشرع والكـف مقصـور=ومن زل سلطـات البلـد يسجنونـه
اصبر وعادي يربض الحـظ ويثـور=وان ثار فـك القفـل لـو يقفلونـه
وعليك باللي يطلبـه كـل معسـور=ترى الأمـر بيديـه والكـون كونـه
ومعك اختصرت الرد من غير مقصور=ارجي عسى اهل المختلف يسمعونـه
والمعذرة عن القصور