السلام عليكم .. وكل عام وانتم بخير..
هناك الكثيرون ممن يستحقون المدح ..
وهناك فرق بين المدح والتملق .. وهذا الاخير هو الدارج في اسواقنا ومرغوب لدى البائع والزبون ؟.
اما انا هنا ليس لي علاقه بهذا ولا ذاك
فقط .. هي رساله تقدير .. من قلب صادق..!
الى علي خليف خلف الرشيدي..
مع رسالة اعتذار مرفقه من السيد الشعر.. لعجزه عن التعبير لوصف مالايمكن وصفه..
ياهاتفي قم سطّر القاف تسطير= رتب حروف الفكر واحفظ كلامه
ارسل سلامي في "رساله" و "تقرير"= وبشّر؟ عسى التقرير تم استلامه!
ياصل(علي) راع الدلال المباهير= عال المقام اللي يسد بمقامه
لك يـا (علي ) مني تحيه وتقدير = ولك هامةٍ تعلى على كل هامه
يابو سعيد الله يمسيك بالخير= جعلك سعيد وكل يوم بسلامه
ياراعي الفزعه طويل الاشابير = بالطيب لك بيت الكرم والكرامه
عند اللوازم ماتحسب المخاسير= شرواك باللازم سريعٍ ولامه
ووقت المواقف ماتعرف المعاذير= تحرم على وجهٍ نصالك الملامه
غيرك وقف..! بس انت ! في وقفتك غير!!= وقفتك طيب..! وطيب غيرك رخامه..!!
كنك معزب .. والمراجل مسايير = والطيب لك مكفول تحت الاقامه
اشهد شهادة حق ماهي بتزوير = انك شداد العز.. ذروة سنامه
لانك ولد من يعتزي للمظاهير = زيزوووم يكرب للمراجل حزامه
يشعم وجاره للوجيه المسافير= ذاك الكريم الله يرحم عظامه
سليل مجد مطوعين المعاسير= اللي لهم تاج الشرف ..والشهامه
يفدامك من ربعي كبير المصارير= اللي يدوور بالصراير زعامه
مافيه خير.. ولاورى ساقته خير= عندي حضوره صار مثل انعدامه
والا انت قدرك فوق روؤس المشاهير= والحر يكفخ .. والنعامه ..نعامه
اقولها واهل المراجل مخابير= واسعى لكسب المحترم واحترامه
وافخر بمدحي للرجال المناعير= ولزومهم .. واجب .. عليّ التزامه
وسلمت ووفود التحايا طوابير = وفد"ن" رفيع ووفد عالي مقامه
يوم انها طالت علي المشاوير= والشعر برمج هاتفي مع نظامه
سطرت شعري في رساله وتقرير= تقـدير!! للي يستحق احترامه