[خالد العويمري]

اجاذبك الهوى واطــرب واغني =
وابادلك الغرام بكــــــــل فنّي

واشاهد صنعة الله فـــي جمالك
وحكمه الذي فيـــــك امتحنّي

واشوف الودّ فـي عيونك ولكن
يردّ الودّ خوفٍ فيــــــــك منّي

ولا ادري وش يخيفك ياحبيبــي
وانا بك مغرمٍ جــــــاك متعنّي

ولو انك تلاحظ شفت عينــــــي
وهي تروي حديث الحب عنّي

تنعّم دام تــــــوك فـــــي شبابك
ليال العمر ماقــــــــط امهلنّي

تعال اسقيك من جدول غرامي
شراب فيه للعاشـــــــق تهنّي

واهيم بك بسمــــاوات المحـبه
الين انّك بعــــــــــد مثلي تغنّي

خالد الفيصل



وقف ترالي


وقف ترالي والهواوانت ميعاد
يامن جمع بشفاه جمره وماها

طق اللثام ولاتبين لحساد
لا لا تخلي كل عين تراها

في شفتك جمر حمر فيه وقاد
اغليت انا لون الجمر من غلاها

اخاف من واهج شفاياك يزداد
يحرق ورود الخد واهج سناها

وردٍ على غصنٍ من البان مياد
ورد نمى في ظل رمشٍ كساها

رمشٍ على جال النواعيس صياد
ذبح القلوب اللي تعرض حماها

عقلي وقلبي منك في حرب واجهاد
واشوف دق القلب ميل خطاها



أسابق الساعه


أسابق الساعه و تسبقني الساعه
تقضي و انا توني باوّل ثوانيها

أبشتري وقت وين اسواق بيّاعه
ياللي تبيع الدقايق حد و اشريها

قلبي يبي وقت لو الوقت ما طاعه
و عيني تبي شمس لو الشمس تعميها

و نفسي مثل باقي الاجواد طمّاعه
ابي اجدّد على الفرحه لياليها

لا شك الايام للفرحات منّاعه
لو نوّرت ليلةٍ عشرين تطفيها

يظهر ثبات الفتى و النفس مرتاعه
خوفٍ على اللي نحبّه من بلاويها

لو ان كل ينال مناه بذراعه
خذيت حقّي من أقصاها لدانيها

المشكله انك يابو لحظين بتّاعه
تاخذ سلاحي من الكفين و أعطيها

و انا ادري ان العيون السود خدّاعه
لا شك ودي أصدّق منك داعيها

و المهتوي لاهتوا مايطوي شراعه
يمشي على النار كنّه ما وطَى فيها


يازمان العجايب


يا زمان العجايب وش بعد ما ظهـر
كل ما قلت هانت جـد علـمٍ جديـد

إن حكينا ندمنـا وإن سكتنـا قهـر
بين قلبٍ عطيب وبيـن راس عنيـد

لو تفيد المدامع كـان أسيّـل نهـر
مير كثر التوجّد والدمـع مـا يفيـد

اصبر ايام واشهر واتصبـرّ دهـر
وان حصلّ لي مناتي جيت لوني بعيد

ارجي الله واراقب كل طالـع شهـر
يجلي الهم عني أو عسى مـا يزيـد

يا غزالٍ فضوح الزّين عنه أشتهـر
في عيوني ملاك ووسط قلبي وحيـد

مخطي اللي يشبّه وجنتـك بالزهـر
الزهر ما له رماحٍ تصيب وتصيـد

لو جحدت المحبة سقم حالـي جهـر
مير ما كل قلبٍ ياصل اللـي يريـد


خالد الفيصل

الموضوع الأصلي: اجاذبك الهوى واطــرب واغني | | الكاتب: خالد العويمري | | المصدر: شبكة بني عبس