أمس الضحى في مجمع السوق جاني=غرو(ن) يسل الروح زيـن امشيانـه
شفته يخازرنـي ويضحـك وزانـي=واشـوف فيـه مـن المحبـة بيانـه
أخذت لي ساعة وانـا فـي مكانـي=وهو يخازرنـي وهـو فـي مكانـه
مشيت يمّـه والغضـي مـا دعانـي=أبنـشـده وش حاجـتـه ووقفـانـه
قلت انت وش حاجتك يا مودمانـي ؟=يا عوق من مثلي رمـى بـه زمانـه
ضحـك يقصّـر كلمتـه بـه نفانـي=وليا ضحك يظهـر طويـرف ثمانـه
يقـول أنـا لـولاك ماجيـت عانـي=جرحـك بقلبـي قـد تبيّـن ضمانـه
جحدت حبـك ليـن حبـك فضانـي=خفيت مـن عقـب الحيـا والوثانـه
قلت انت ا ظنك جاهل(ن) معشرانـي=قلبك على الضحكة وسيع(ن) بطانـه
تقـول هـذا شافـنـي واشتهـانـي=لاشك اباضحك لـه وازيـد امتحانـه
قال انت في حبـك تعـادل اخوانـي=أنـا قتيـل الحـب مـابـي لعـانـه
محد(ن) ومرني لك ولاحد(ن) نهانـي=أعرف صحيـح العلـم كانـك تكانـه
قمنـا نسولـف بالرجـا والتمـانـي=كل(ن) ركـد قلبـه وهـان اخفقانـه
نبـي نثبّـت موعـد(ن) يـوم ثانـي=مستانسـيـن ولا عليـنـا اعيـانـه
جتنـا عجـوز(ن) قلبهـا مشبهانـي=هي ما كر الظـن الـردي واعرفانـه
شيبا من العجـز الطـوال المحانـي=ذرعانها اضعف من عصا الخيزرانـه
ماهيب من بعـض الحريـم الوثانـي=ملقوفـة(ن) مـا ظـن فيهـا ديانـه
قالـت وراكـم ياخبـاث المعـانـي=ما تستحون من العبـث والشطانـه ؟
قامـت تهددنـي بعلـم(ن) كـوانـي=خـلاّ هـوى بالـي يزيـد اوحشانـه
تقـول هــذا غــادر(ن) قلّبـانـي=ياما لعب في قلـب غيـرك وخانـه
قلت اسمحـي يامـال بـرد الجنانـي=يـا عمّتـي سـدّي معـك بالامانـه
الناس في عيـد(ن) تـدور الحسانـي=حتـى الربيـط يواجهونـه اخوانـه
خوفي من الله يـوم عيـد ارمضانـي=وش لك بسـد المبتلـي واكشفانـه ؟
والله مـا ناشـت ثمـانـه ثمـانـي=وش لك علينـا باللغـى والاهانـه ؟
أمشي على فالي ولا احد(ن) دعانـي=من عرض ناس(ن) كل زول(ن) بشانه
قالـت نعرفـك يانظـيـر العيـانـي=ما نيـب مـن تغبـى عليـه الذهانـه
ان عاد شفتـك عايـد(ن) هالمكانـي=والله لاقـول فـلان باغـي افـلانـه
دريـت مافيهـا صخـاة وحنـانـي=واعطيتهـا علـم(ن) قريـب الهدانـه
قلت ابشري يـوم ان ظنّـك دهانـي=أنـا بحـفـظ الله وانـتـم بامـانـه
أقفيـت أذاود عبـرتـي بمشيـانـي=والقلـب كنـه ترتكـز فيـه زانــه
ياعـلّ مـن سلـط علـي وحدانـي=يحدى على مكوى حديـد(ن) سنانـه
يصبر على جـزره وهـو مايدانـي=من سم داب(ن) شقرتيـن(ن) لسانـه
وليـا خلـص مكـواه زاد اكفخانـي=سمّـه علـق بالكبـد قبـل اكويانـه
تاخـذ لهـا ساعـة تجـر انهتـانـي=قبـل الولـي منهـا يشيـل الامانـه
تقـول بايحنـي وانـا اقـول مانـي=مثلـك علينـا مـا يجـوز اشرهانـه
أنـا ليـا متّـي وجـا يـوم ثـانـي=والله لجـي قـبـرك وازوّد دفـانـه
واقـول هـذي حوبـة المولعـانـي=هـذي سبايـب حرّتـه واحسـدانـه
منتـي بمثـل العجـز يـم النوانـي=العجـز فيهـن قشـر وبهـن ليّانـه
وانتي عـن العربـان فرقـك بيانـي=كـان العجايـز تمـر انتـي خنانـه
وسلامتكم
للشاعر المرحوم مرشد البذال الرشيدي رحمه الله