[العريض]

يا الغايب اللي غابت سنينـي معـاك

يا جعل ما جاني مـن الفرقـا يجيـك

استغفر الله ! جعل مـا جانـي فـداك

حتى لو ان نهايتـي .. علـى يديـك

مسامحك .. واللي بقوله فـي قفـاك

خيرك كثيـر .. ويرحـم الله والديـك

ما صار شي ابلا رضاي إلا رضـاك

اللي مهو فينـي وابيـه القـاه فيـك

كنت السما في عيني وعيني سمـاك

كانـت حياتـي كلهـا منـك وإليـك

كنت بيديني مير مـدري مـن خـذاك

حسبي على تقصيري وحسبي عليك !!

علمتني .. وش الحياه مـن الهـلاك

في موادعك هذا وفـي جيّتـك ذيـك

يا كيف ابلقى شخص يسواني سواك ؟

كل ما نويت انهيك في شخص ابتديك !

ابـدى اقـارن مستـواه بمستـواك

واخاف لا تزعـل وابيعـه واشتريـك

والمشكله : رغـم محبتـك وغـلاك

واني رغم كل شـي مشتـاق وابيـك

ما هوب من حقي يضايقنـي جفـاك

ولا اعشقـك والمحـك ولا احتريـك

لكن مـا يخفانـي ولا اظـن يخفـاك

حقي عليك .. انـك تطمنـي عليـك

الموضوع الأصلي: مسامحك واللي بقوله في قفاك=خيرك كثير ويرحم الله والديك | | الكاتب: العريض | | المصدر: شبكة بني عبس