*** نكبة زمـــــن ***
يامرحبا ترحيب وافي ومدبول = ترحيبة وسع الفياض وبحرها
ترحيب لاهل العز والطيب مرسول = اعداد ساعات الزمن وشهرها
واعداد مايعجز لساني عن القول = عن شكر ناس ماوفى لو شكرها
واعداد ماسجيت والبال مشغول = باسباب فرقا اللي حياتي دمرها
واعداد شوقي له من الحول للحول = وانا اتحرى جيته وانتظرها
في شاعرا ساق المعاني على وصول = يشكي من اهوال السنين وكدرها
جاني وقلبي ممتلي هم وغلول = ولم الهموم وفوق همي زبرها
باح بحقيقة صمتها كان مذلول = اعظم جريمة قتل وابشع صورها
وقصة ( بري عاجز ) بالاغلال مكبول = اخفى حقيقتها الزمان وسترها
وسرابي الهاجوس والقاف معسول = وحضرت عفريت القصيد وحشرها
وبديت اسطرها بلا جهد مبذول = نوب اتعاسرها ونوب اعسرها
يامرحبا بك جيت والحبل مفتول = وجيت انقضه واتبع بقايا اثرها
اصبرعليه واستمع كل ماقول = واحفظ وصية شاعر ماذخرها
شاعر يصول بجبهة الشعر ويجول = وليا انكسر وزن القوافي جبرها
خيال كان الشعر له ركوب وخيول = وادمح خطأ ناس وناس احتقرها
يوم ان غيري عاش محفول مكفول = عشت الضروف بخيرها وبقشرها
وما هنت نفسي عند ذولا ولا ذول = وماعاش من هان النفوس وحقرها
صاحبت بالدنيا سرابيت وزحول = وبعض الوجيه بنظرتي ما اعتبرها
ماكل ماتسمع من الناس معقول = وماكل من شاف الحقيقة ذكرها
وما كل زرع لو سقي منه محصول = وماكل شجرة ينجني من ثمرها
كم عاقل عقب العقل عاش مهبول = وياما رجال الوقت جار وسطرها
وكم سطر التاريخ فارس ومخذول = وكم عز نفس وكم نفوس ثبرها
للحكم عقل وللوعي رجال وعقول = وللخيل راكب وللمساري سهرها
للسلم حلف وللقا سيف مسلول = وللخوف ضعف وللمنايا قدرها
ومن ديرة المنفا الى دار ابا الهول = تبرق سماها والرعد مصتقرها
من علم الاطفال بحكاية الغول = واذهل فلذات الكبود وذعرها
ضاعوا رجال العرف في زحمة خبول = وراحوا صناديد الرجال بخبرها
ياخوي انا زندي من الدمع مبلول = ونفسي عن احلامي زماني عسرها
دروبنا ياخوي ماعابها وصول = وعزومنا ظيم الليالي كسرها
والدار غربة والوطن صار معزول = نكبة زمن واللي عمرها دمرها
قبلك صبرت وباب الافراج مقفول = وطالت مشاوير السهر في سهرها
واصبحت في واقع متاهات مذهول = وعجزت اميز شمسها من قمرها
تلعب بي الدنيا على كف مسطول = اغدى الدروب وللمهافي حدرها
مدري صباح احلامنا مات مقتول = ولا انتحر صبح الفرج واختصرها
لكن على الدنيا سلامي وياحول = صكت علينا خدوشها مع قهرها
وماقلت يكفي بس ابعيد واقول = نكبة زمن واللي عمرها دمرها