[بندرالرشيدي]

بسم الله الرحمن الرحيم
السلام عليكم ورحمة الله وبركاته

عذرا على الغياب لظروف خااصة...وأعود..
بمأساة الأمة الإسلامية هنا..وكلي لوعة وحرقة..

قصيدة..كتبتها..للتو..ومازلت..أنزفها..

إليكم القصيدة....ضعوا أنتم عنوانها..


(...................)

يابوش خذ بندقك..وافزع لغزة=بالثوب والبسام لاتحط طربوش
اركب على جمسٍ يهيض مفزة=لاحاشته صدمه ولاهو بمغشوش
في (تل أبيب)الجمس يابوش لزه=مافيه بعد الله غير أنت يابوش
أولمرت تله في جبينه وحِزه=يالدفش لاتاخذْك رحمة بدفّّوش
حنا معك..يابوش في كل حَزه!!=وإن جيتنا في دربك الورد مفروش!
فعلك..تبين في العروبه محزه=أكبر رئيس بمنصبه منك مخروش
أطلق شنب فينا بعينك..تخزه=ماكنه الا فرد وعيونك جيوش
يحق لك تفعل وكفك تهزه=وتلمنا مثل الغنم داخل الحوش!
وقتٍ يعدوا به رجال المعزه=وأكثر سلاطينه هراميل وختوش
السيف شلته في يمينك..بعزه=تذبح وتسلخ سلخ..والعرض مخدوش
مايمنا يابوش نخوة وعزه= حنا(دعاة السلم)!!مانعرف الهوش!
خذ ماتبي يابوش شخصك نعزه=يامذبح الخرفان..ياراعي الغوش!!
برميل نفط يقابله ..كيس مزه=..والا بلاااااش...الرز يظهر لنا كروش!
المالبور الأصلي اللي تمزه=خفف شوي آخاف يذبحك يالبوش.
ماهو بحبٍ فيك حبٍ بغزه=خايف تروح وتصبح بيوتها نعوش!!!!
يابوش خذ علمي لربعك ودزه=إن العروبه عندنا قبر منبوش
والله مافي القبر فزعه وفزه= ألا...على انفسنا صناديد،،ونهوش
فينا الشجاع الفذ رمحه يكزه= في ظهر ابن عمه...ولاينوشكم نوش
عندي طلب واحد بحكم المعزه= مادام صرت أمون وتمون..يابوش
لبنان في حاجة رئيسٍ ترزه=عجل ترى وضعه كما العهن منفوش
يااااااااذل من يابوش تبغا تعزه=أقولها..والدم في جسمي يغووش!
خذ راحتك..يابوش واقتل بغزه=والله ماعندك..عرب كلنا طروش!!

____________________


أسأل الله جل..وعلا ..أن ينصرنا على من عادانا..
ويرحم شهداءنا ويجعل..لنا فرجا عاجلا ليس آجلا..

وأن يحيي..قلوبنا الميته..ويبعث فينا روح التوحد..والجهاد.
هو ولي ذلك..والقادر عليه..

محبتي..وتقديري...

بندر الرشيدي..

الموضوع الأصلي: يابوش خذ بندقك..وافزع لغزة**مافيه بعد الله غير أنت يابوش!!! | | الكاتب: بندرالرشيدي | | المصدر: شبكة بني عبس