يابو سعد مبروك مليون مره
على الزواج وجعل ربي يهنيك
عقب العزوبيه ونوم المضره
وهواجسن في لذة النوم تاتيك
الله رزقك بشخص ثاني تبره
وهو يبرك في حياتك ويغليك
على الشريعه بعد ماسقت مهره
وقبل المهر دونه تحدك شرابيك
ولالك وسيله غير بيته تمره
في شارعه مرار واتعبت رجليك
واليوم جاد الحظ من بعد عسره
بامر الكريم اللي يحقق امانيك
جود حزامه بالغلا لاتفره
ورحب بشوفه واشبك يديه بيديك
وانسى زمانن فات خيره وشره
فرقا العزوبيه هي اسعد ثوانيك
هذي طراة العمر والعمر مره
اكملت به دينك وهو كامل فيك
ولا اقول غير الله يديم المسره
ومن عين حسادك والانذال يحميك
مثلك عسى ربي يطول بعمره
ياحر ياعرب الجدود ومجانيك
من طيب ابوك بطبع جدك وجسره
فيه احتفظت وفي طريقه مماشيك
بالمجد لك في صفحة الطيب جره
ماهي غريبه وانت من عبس تاليك
عبس الرجال اللي عدوك تضره
ليا انتخيت يجون صفن حواليك
لهم فعل كل القبائل تخبره
تاريخ الفعال الاحرار ينبيك
اهداء من الشاعر/عبدالرحمن هليل الرشيد