اسمعوني قبل اعلمكم عـن اللـي خافـي
اخر القصه تـرى ماهـوب مثـل اولهـا
كل ما جيت اكشف الموضوع واكتب قافي
تصعب الدعوى ولا ادري كيف باوصلها ؟؟
المهم اني ما زلت ابدي علـى مشرافـي
واكتب الابيات في الشاشه لكم وارسلهـا
تكثر اخطائـي وامررهـا مـع محرافـي
دون معنى والعـرب مـن حبهـا يقبلهـا
ومن يسجلها رصيد اسمي ورسمي كافـي
قد نظمت من العقود احلا الدرر واجملهـا
مزحة الطيّب يبش بهـا الكريـم الوافـي
وبيّص الله وجه من يضحك ولو جاملهـا
لا تعاتبني يا وجه الخيـر ليـن استافـي
وكان في خاطرك كلمه بعد هذي ,, قلهـا
ادري اني واعرف انك واخذ شي اضافـي
ما نجـادل عالـم ٍ مـا ينفـع مجادلهـا
القناعه كنز والرحمـان ستـره ضافـي
وبعض الاشيا عاض عن مظهارها مدخلها
لا بدا اللازم بديت وخـذت حقـي وافـي
غصب ,, والا البلبله بتحصل مبلبلهـا !!