أبوعمره:
هلا يا مرحبا في صاحبي عباث
بعد ما جيت والجيه طبيعيه
جميل البيت لكن باقي الاثاث
عسى ربي يعين امن الشريطيه
عباث:
يدوم الك البقا والطيب له حثاث
بعد ماجيت والجيه هي الجيه
اظن احلامك اللي قلتهن اضغاث
،نبيك اتجيب الاحلام الحقيقيه
ابو عمره:
على وقت الحصاد انشغل الحراث
لو المنشا غيومه تنتثر ميه
بعد شفت الربع صارت ثلاث اثلاث
لو ان الفلم احداثه خرافيه
عباث:
لاصرت اتميز الحرمل من الجثجاث
على حرث المزارع درج النيه
عطونا ياعرب من ترثة الميراث
لحقنا وقت تاسيس السعوديه
ابو عمره :
فساد الارض في تالي الليالي عاث
على يد الحرامي والحراميه
بعد شفنا وشفتوا زبدة الاحداث
بلا اعلانات واهدافٍ تجاريه
عباث:
بلانا اللي زرع له ثوم مع كراث
ودس الداب وام الداب والحيه
ليا جالك على بعض العلوم اغلاث
تصبر واخذ لك حبات نفسيه