[سعد بن عادي]

هذا وانا عزتي دايم قبالي تلوح
لين اصبحت في حياتي ميزة فارقه
امشي وهمي جبل يمشي معي وين اروح
ازريت اشيل الجبل وازريت لا افارقه
كل الخطاوي تعب كل الخطاوي جروح
ارضي هجير وسمايه شمسها حارقه
ما غير روح التحدي في عروقي تفوح
قوة صمودي على جور الزمن خارقه
ارفض شعور الندم وارفض طمان السفوح
لو كان فيه الحياة اغصونها وارقه
ما دام فيني نفس يذري وفيني طموح
باب وراه اعتزازي طارقه طارقه
رغم امتداد التعب عيا يموت الطموح
والشمس بكره ورغم انف الدجى شارقه