الغالي اللي يروح ويرجع الغالي
لو ان زماني جهلني ما تجاهلته
مديت كف الوصل واسرفت بوصالي
والحب من خافقي لإرضاه سيّلته
بادلني الشوق وكســّر رهبة آمالي
وانا بنفس الغلا والشوق بادلته
ياشوق قلبي عليه ويابري حالي
هذا شهر من بعد فرقاه كملته
ارسلت له شوقي ولافاد مرسالي
ليته يرد الشعور اللي له ارسلته
هذا شهر والحزن فاحت به دلالي
وانا يا لولا عيونه ما تحملته
وشبيت ضو القصيد اللي على بالي
إلين مااحرقت ذاك الضيق واسئلته
لا طاب فكري وثم جريت موالي
علمته ان الشعر عديت مرحلته
ماهو غرور ٍ .. ويكفي اشرح التالي
وجهة نظر شاعر ٍ دنياه بهذلته
الشعر ماهو كلام وحكي ينقالي
الشعر حسبه ويصعب في معادلته
من يعرف الفرق بين المر والحالي
بيعرف ان الشعر راحت فطاحلته
شاعر رخص ذمته وبسبة ريالي
وشاعر رفع من قدر شعره بمرجلته
وشاعر يشد الحضور من اول لتالي
وشاعر يغث الحضور ان جاب مهزلته
وجهة نظر ... وارجع احسن لي لمنوالي
للغالي اللي كثر ما احتال ما احتلته
غنيت للحب يوم الحب غنالي
وغنيت ابرتاح يوم الضيق حصلته
احيان ودي اقول اللي على بالي
واحيان احس الكلام يموت لا قلته
دخيل ربه يناظر بس بحوالي
ويشوف كيف ابتدى همي وكملته
وابيه بعد البطا يقبل ويصفالي
واسمّعه بيت واحد توني قلته
ماهي غريبه يغيب بدنيتك غالي
بس الغريبه اذا جاك وتجاهلته..!!