العام روّح وأقبلت عطلة الصيف
وكل الخلايق للسفر مستعده
آحدن على روما والاخر على جنيف
وآحدن ظروفه يالنشاما تحده
وآحدن ينام ابدون غرفه وتكييف
وآحدن يجر الثوب ما هوب قده
وآحدن نجح وأمه تهل الغطاريف
وآحدن رسب وموسّم الكف خده
قامت تصافق في ضلوعي تحاسيف
ماعاد لي في داخل الروح شده
قلبي شفوق وناوي للمشاريف
شفاقة الاشقر بلحظة مهده
ياصاحبي ياللي تفوق التواصيف
حبل الوصل في داخلك لاتشده
اليا متى فيك المشاعر ملاهيف
واليا متى باقي من البعد مده
قلت الاوادم كل ابوهم ملاقيف
والعلم كانك تستحي منه بده
يالعنبوا فنجال مايروي الكيف
راعيه غالي تستحي لا ترده