هذه احدى روائع الامير الشاعر/ معلث بن مصلح المقوعي (رحمه الله)
في مدح بني رشيد . . . حتماً ستحوز على رضاكم
قال المقوعي قدر الحـرف تقديـر=لاخيـر بالدنيـا ولـذة منـامـه
يامنيف عقب ربوعنا جت معاصير=والجو أشوفه قـام يـذرى كتامـه
يامنيف وين اللي يجونـا مساييـر=أهل الشرف والطيب وأهل الشهامة
أهل البيوت اللي عمدهن كواسيـر=ربعي اليا صارت علـىٌ الغرامـه
ماتقل بأرض الصور بنو دواويـر=ولاتقل شفـت بيوتهـم والجهامـه
توادعوا بالصور واقفـوا مسافيـر=الله يوفقهـم طـريـق السـلامـه
تشالعوا من عندنا شلعة الطير=صلف(ن) هواه وشاف فرخ الحمامه
بس العجاج اقفيهم له تثاوير=مرباعهم جو(ن) كثير(ن) رمامه
تلقى لهم بارض الموشم مقاطير=هاك الديار اللي رفيع(ن) مقامه
مدهالهم يوم الليالي مخاضير=إليا اشتبك عشب السهل مع خزامه
أهـل بيوتـن مجمـع للخطاطيـر=والضيف عصبان المفطـح يدامـه
برفافهم تلقى الأوجيـه المسافيـر=ودلالهم من حب صنعـاء طعامـه
ونجر(ن) يصـوت بالليـال المعاسيـر=ونـار(ن) ينـادي للطرقـي شعامـه
ندعي لهم بمكبرات المزابير=غر(ن)على صفر المخيط انهشامه
غر(ن) هللهن فوق لابة زبيعير=منه المخيط يشيل راس العدامة
وتضفي على نجد المزون الشخاتير=وراع الغنم والبل يطش المسامة
ياخذ سنه ما شد يجمع من الخير=ويمضي زمانه مارحل عقب قامه
وتخضر ديـار مدلهيـن المعاشيـر=بني رشيد اللـي حكـو بالقوامـه
بني رشيد اليا اعتمـن المشاويـر=وصارت على من شار فيها ملامـه
وصاح الصياح وقيل ماانتم على خير=مير افزعوا وخذ الدبش مع خيامه
وقالوا ترى قوم الدبش حرب ومطير=ربع(ن) على الردات يعجب نظامه
يبون اباعركم وخز العاشير= وضارين لأخذ اللي ردوم(ن) سنامه
لحقوا على شهب(ن) واهلهن مناعير=وحمي الطراد وصار عند الجهامة
وتعاطبوا بالفعل عند الغاتير=وكلن جرد سيف الفرح من إلجامه
ولجن بنات البدو حدر المقاصير=وقبقب شراع العز عقب انهدامه
واقفت نحور الخيل عنهم مدابير=وكل ابلج(ن) فاخت هدفه ومرامه
هاذي عوايدهم تفك المظاهير=لاطار ستر اللي جديد(ن) وشامه
ربعي هل الـردات مابـه معاذيـر=بني رشيد عـزات منهـم عمامـه
وربعي اليا نامووا بحدب المناظيـر=كم واحـد بالكـون بتـو حزامـه
اليا عودو قفـوا المتلـي صوابيـر=وصارت على من شار فيها ندامـه
مركاضهم يشبع به السبع والطيـر=والضبعة العرجـاء تغـز العلامـه
صيـارم يـوم الملاقـا سواعيـر=والعمر يهدونه لمـن كـان سامـه
ومن قال حنا أطيب فهو ماعمل خير=يظلـم نصيبـه والقبايـل اكعامـه
الناس مثل الناس مشـاي ومغيـر=وكـلٍ علـى حـده وكلـن بزامـه
والفعـل ماخـلاه عـرار لعمـيـر=وذياب ماقنعـس لشلفـاء سلامـه
هذا المثل والناس تمثيلهـم غيـر=والعيـب باللـي مايثمـن كلامـه
ماحـط بالقيفـان كـذب ومعاييـر=والصدق صابون الفـؤاد وختامـه
وصلوا على اللي حج مكة بتكبيـر=نبينـا اللـي شـرف الله مقامـه