[عاشق الطير]

السلام عليكم ورحمة الله وبركاته

حياكم الله

هذه قصيدة بعنوان ( لا تشوف نفسك ) !!

،،،،،،،،،،،،،،

سر ياقلم واكتب وخل العلم ما بين السطور
انتـه تخط احروف والقاري عليـه الترجمه

دام القلم يبعـث حروفه من سبب فوح الصدور
كلن على ما في ضميره قـام يكتب بقلمـه

يا شاعر اليـا صرت ما تملك معك حس وشعور
آجـال طبخ ٍ تطبخـه خلـه بقــدره واكتمــه

لا تقوم عنـدي تفتـل الاشنـاب واتلف وتــدور
انا من اهل الميمنــه .. ماني من اهل المشئمـه

لا تشوف نفسـك فوق والعالم يشوفونك حدور
مهمـا ملكت امن الذهب ما كل مركز تلزمه

دامك تشوف انك على القمــه ورى دمك يفور
علامة استفهـام في علمٍ عجـزت استفهمه !!

واللي يدل الدرب ويحول غزيـرات البحور
ماهوب معصـومٍ من الضيعـه بليله معتمـه

مانيب اطيعك كل ما ناديت واشعلت القدور
ولا نيب طيرٍ لك بشلوك لا بغيتــه تزهمه

صحيح انا قادر وعندي فكر واسلاحٍ يثور
لكن ما اطبل خلاف الكـــافره والمسلمــه

آخذ من اهل المعـرفه واتبـع طويليـن الشبور
واليـا لقيـت الجـاهل المغرور اقـوم اعلمــه

وان كان قصدك من ورى الموضوع تصفيق الحضور
ما صفقوا غير المجنّـن في الزوايا المظلمـه

المشكلة عمرك دبل عمـري وذابحك الغرور
وانا على العشـرين وآقدر رفيقـي واحشمه

ابليس شغله فتنـة العربان في كل الامور
يا كم حبل يقطعـه .. يا كم عمــارٍ يهدمه

والشعر تال الوقت حـاله من دبور اليـا دبور
وانا الحقيقـه ما بقـى يا كود اقوم أحرّمــه

الرابح اللي يقـرأ القرآن في وقت السحـور
وجنّـب طريق المهـزله والسخـريه والنمنمـه

واليـا وهبـه الله فصـاحه لا يزل ولا يبور
ولا راح يرسلهـا من لسـانه سوات مسيلمــه

والحر يفهـم بالاشارة وانت من ماكر صقور
قـدام حزت ينـدم الرجـال ما يفيــد اندمــه

يالله عسى ايامك فرح يالله عسى اسنينك سرور
وصلك كتابي وادرس المكتوب هذا وافهمـه

تراي اكمل واجبي ولا يجـي مني قصور
ولا نيـب حاسب ناتج المجهـود هذا واعـدمه

هذا كلامي واطلب التوفيـق من ربٍ غفور
وعلى النبـي ازكـى الصلاة اعـداد وبل المرزمـه

وسلاااااامتكم والف عافيه

الموضوع الأصلي: لا تشوف نفسك | | الكاتب: عاشق الطير | | المصدر: شبكة بني عبس