ادفع ثلاث ارباع عمري لجل يوم
اجلس انا وياك وآخذ كثيرك
واليا حصل يومين الله من علوم
واليا بغيت سنين انت وظميرك
تراني استاهل وانا منك محروم
لاتحرم اللى منتظر مد خيرك
تعبير وجهك يعتبر طارد اهموم
غمازتك اجرام الله يجيرك
بحات صوتك وانت صاحي من النوم
تكره اللى يكلمك .. صوت غيرك
تنهيد صدرك وانت ضايق ومهموم
من حسها سلم مصيره مصيرك
كلك على بعضك اليا جيت ملموم
ما تنحسد الناس تحسد عشيرك
ياخي لحقني منك شرهه عتب لوم
قلبي كسيرك وانت تطعن كسيرك
شفني اخايل بالسما برق وغيوم
ضميان وانت تشح عني غديرك
انا اعد من السهر ظيم ونجوم
وانت تحضن مسندك في سريرك
خلك على وضعك عسى وضعك يدوم
بس ودي في بعض الامور استشيرك
اذا اعتبرت اني اسيرك ومن قوم
ماهو كذا اصلا تعامل اسيرك
واذا افترضت ان فيه ظالم ومظلوم
تدري !! بلاش من افتراضي يثيرك
واذا بحياتك شخص فيه انت ملزوم
لاصار اهو اولك مابي اخيرك
لكن تأكد من عرفتك لهاليوم
انا حياتي مابها شخص غيرك