إن صار زود المال بيديـن الانـذال
حنّـا مـن المعـروف تنـدا يدينـا
وان كانهم شرهوا على طيب الافعال
حنّـا وردنـا جمامهـا وارتويـنـا
وان فكّروا للجـود يمشـون رحّـال
حنّـا قبـل يمشـون يّمـه خطينـا
يا ما لبسنا للشـرف كـل سربـال
وعلـى البسيطـة للفضيلـة مشينـا
في دوحة العربا لنا مجـد وظـلال
وحنّـا علـى در المكـارم غذينـا
لو نجمع اللي فات منـا مـن المـال
إن كـان شيدنـا القصـور وبنينـا
نعطي ولا نتبـع عطانـا بالاقـوال
ونبذل ونسكـت كننـا مـا عطينـا
وان باعوا الشيمـة بدينـار وريـال
حنـا دخلنـا سوقهـا واشتريـنـا
نطلع لها لو هي على روس الاقـذال
لو هو عسير ٍ دربهـا مـا انثنينـا
بافعالنـا نرسـم دروب ٍ للاجيـال
إلـي نساهـا غيرنـا مـا نسيـنـا
أسـود سـادات ٍ تسجـل للاشبـال
فضايـل ٍ شمنـا لهـا واهتديـنـا :