معاد باقي غير أشوفك على خير=مع السلامه والفراق السلامه
من عقب شيٍ صار وش عاد بصير=أكبر من جروح الحنين وهيامه
دايم مكاسيب المحبه مخاسير=تجني على الولهان ويل وندامه
ماهل دمعي فوق خدي محادير=ألا بعد ظلم الغرام وظلامه
عن كل شيٍ تبت توبه وتكفير=ألا أنت ياذنبٍ حلالٍ حرامه
أسرفت في حبك وبذرت تبذير=وقدرتك بقدرٍ ماتسوى مقامه
وأسقيتك بكفي زلالٍ من البير=أصفى قراحه من عيون الحمامه
وصخرت لك من صافي الود تصخير=على مواريد الخفوق وغرامه
ماخطيت في حقك ولاجاك تقصير=حتى العتاب أعاتبك ببتسامه
حاولت أدور عن غيابك معاذير=وأستر غلاك اللي بقا بالشهامه
ياحيلة الله لو تفيد التدابير=ماشفت فيني من جروحك علامه
وفيت معك وشفت منك الجزى غير=وأنا أتحمل غلطتي والملامه
من طوّل الهجران من غير تبرير=الله على دربه يسهل مرامه
لاتعتذر بفراقنا والمقادير=من عافني يروح ومع السلامه
الغصن كم غنى تحت ظله الطير=ويطير ماعلّق اهتمامه