[عيد الداموك]

لاتنشغل فيني أنا بحالي أدرى
قلبٍ تعلّق فيك ينسى مع الوقت

أكثرمن اللي صار لي ويش يجرى
بين الرجا والياس فكري تعلّقت

مثلي ولوشفته عن همومه أزرى
ماقال ليتك في جروحه ترافقت

أثرالوفا ينباع عندك ويشرى
ماكنت أصدق فيك واليوم صدّقت

لاطافت الفرصة تحريت الأخرى
وتروح ماكني عليها تشوقت

ساري لو إن الليل مافيه قمرى
أشيل من حمل الهوى فوق ماطقت

صحيح بعض الناس فرقاه بشرى
وبعض البشر لا غاب ليلة تضايقت

ليتك خذيت بليل الأحباب مسرى
غربت من كثر الطواري وشرّقت

السيل يبقى له على القاع مجرى
ويبقى لك التذكار لو كنت فارقت

أشوف لك من وين مارحت ذكرى
ولا شفتها صديت عنها ودنقت

ماكل جرحٍ لا خذ أيام يبرى
بعض الجروح يزيد شره مع الوقت