[سعد بن عادي]

طيرٍ تربى في قفـص صـدري وقفلتـه وراه
روح ضحيـة كذبـة الحريـة اللـي أغـرتـه

هاجر وخلاني ولا ادري وينها ارضه من سماه
اثره مثل كل الطيور يعرف موسـم هجرتـه!!

راح وترك لي من جناحه ريشتين وحوض مـاه
الريشتين اللي سقاها الحـوض مـاه وقطرتـه

كم كنت الوم اللي ليا منـه فقـد طيـره بكـاه
واليوم جربت وتساوت عبرتـي مـع عبرتـه

واصبحت اقول اللي فقد طيره ولا يبكي عـلاه
احسن يعيـش بغبنتـه والا يمـوت بحسرتـه

صحيح من لا داس باقدامه على جمر الغضـاه
لو تنشده ما جاب لك وصف الغضاه وجمرتـه

والمترف اللي في ثرى قلبي زرع بذرة غـلاه
جاني بعد مدة يـدور ويـن راحـت بذرتـه!!

جاني يدور للغلا اللي فـي ثـرى قلبـي نسـاه
من حضرته حتى يجي ينشد عنه من حضرته؟!

ما يدري ان البذرة اللي ضمهـا القلـب وثـراه
شربت من اقصى عرق قلبي لين صارت شجرته

واني تحتها مستظل من الزمـان ومـن عنـاه
مثل الغريب اللي تريـح بعـد طالـت سفرتـه

واني انا الهايم على وجهـي وهـو وادي حيـاه
والقلب غـاوي يتبـع الشاعـر ويتبـع جرتـه

جاني يـدور عـذر لذنوبـه وتبريـر لخطـاه
قلت الخطا من يوم شفتك ما طرت لـي سيرتـه

شفني مثل ذاك الحصان اللي عثر له في حصاه
من جزعته فز ونهض ولكـل جـوادٍ عثرتـه