السلام عليكم ورحمة الله وبركاته
هذه ابيات وصلتني من ابو صوط على الوت سب
يقول
حرام ماتوخذ حقوقي على الفاضي=المجتهد مايصير يضيع مجهوده
اما تعيد النضر ياحضرة القاضي=والا رحلنا عن الديره بلا عوده
واجد عدود الروى واقلط حياضي=يومنها جت من الاصحاب مقصوده
رديت عليه اقول
جاتك على ماتبيها ياخو عياضي=مغلفه في عبير العود ووروده
ولا تستغليتها يالحاضر الماضي=حطيت راسك براس العود وزيوده هههه
طاوعت شلتك ابو راغب وابو راضي=خلوك يالصوط عند المجتمع شوده
والقصيده الثانيه يقول فيها
اسعد الله صباحك يابو صالح بخير=عد ماتشرق الشمس ويبين الصباح
يارفيق العمر يوم العرب والبعير=يوم الايام صعبه والنوايا صحاح
فيك ميزه عن الاصحاب والطبع غير=بالوفا والصراحه لابسلك وشاح
وفيك ميزه صغيره كبر حبة شعير=مثل ريشه ثقيله بين ريش الجناح
لانطحك الهوى متساعدك للمطير=ودك اتصد ماتنطح هبوب الرياح
ويش عذرك لعنتر وابو صوط الامير=وابو فايز وخاتم ريس الانفتاح
ومدار وفلك وشلاش للحرب زير=وعايد الفين والبيطار راع الرماح
وبن عجوين وسعود ابو موسى الخطير=وكاتب وكايد الشعار سمن ذحاح
وغيرهم لانشدت اعطيك سفن شطير=وش مقعدك مع قوماً بليا سلاح
جاوب وعطني علومك بجدول مسير=مانبي يالمعزب غير جابة صلاح
انت شاعر وتعنيني وتعنى الكثير=مابقى الانت وحدك ماتحقق نجاح
رديت عليه ابو صوط هذا ماهو سهل
مرحبا ياخوي المدهنه والمضير=بالليال الغنيه والليال الشحاح
احتسيتك سلاحاً بالنهار الكبير=يوم يطلع مع الشدات دور السلاح
ماحسبنه عليك يهج صوت الصفير=كيف لاثار عج المعركه والصياح
بين حنة بعير المعرفه والهدير=مدة الجودمع صيد الصقور المباح
شنة الشاوي الي تحت جال الغدير=مانضح من لهيب القيض ماها القراح
غرزة المخيط الي فيه سلك الحرير=(الصباحي رشيدي والرشيدي صباح)
مانلوم العذول الي خذيته شوير=يوم خليتله يمك طريقه متاح
شرهتي تلحق الي قلتهم يالامير=كان وصلتهم مسعاي قبل المراح
يابو سامي ترا عمر المجامل قصير=ماكسب من يجامل في حياته فلاح
والا انا بشرك مرتاح منها الضمير=يابو صوط المعزب من ماقلت استراح
وسلامتكم
كما ارجو من المسؤلين في هذه الشبكه عودة النضر في ابو صوط ورفاقه
لانهم من خيرة الرجال ولهم دور كبير في هذا الموقع لن ينسى
تقبلو تحيات اخوكم المعزب