ضاق صدري يا ندا مابقى لحالي بقيّه
اختلف فكري وطاحت عبرة ٍ هزّت كياني
والله انّا فاقدينك في صباح وفي عشيّـه
ليـت ربي قبل اعرف انّه توفـى قد خذاني
مؤمن بربي ولكن موقـف ٍ صعب ٍ عليّه
الحزن من مـر علقم قدّم الكأس وسقاني
مآورثـت الا مواجع باقيات ٍ ليٍ نديّه
اااه من هـم ٍ نعيشه احتويتـه واحتواني
الليالي في عيوني من فراقه سرمديّه
والله ان الوقت بالميسم على صدري كواني
فاضت النفس الزكيّه يم خلاّق البريّه
يومه المحتـوم في دنيـا الفنا والعمر فاني
المحاسن لو نعـدّدها مثـل رش ابرديّه
مزنة ٍ هلت بردها.. سيّلت كل المكاني
الله انّه يرحم اللي ماعطـى درب الرديّه
حافظ ٍ عرضه و دينـه قلتها علم ٍ بياني
يالله انّك تغفر اذنوبه وزلات وخطيّه
وتِسكنه في عالي الفردوس في روض الجناني