ياوقـت غيـمـك ســراب وراعــدك عـاتـي
وانـا ماعـاد اقـدر اوجـاعـك ولا اتحـمّـل
رميـت خـلـف الظـلـوع الـعـوج مآسـاتـي
مــــا مــرّهــا حـــــي يـذبـحـهــا ويـتـجـمــل
الـســاق تعبّـتـهـا مـــن كــثــر خـطـواتــي
والقـلـب تـكّـت عـلـيـه حـمـولـه و نـمّــل
كنت اشتكي زفرة الماضي على الآتـي
و الآتــــي الــيـــوم لاعـــــدى ولا جــمّـــل
تــبــارت دمـــــوع حــزنـــي وابـتـسـامـاتـي
وجـلـسـت اعـايــن بـصـنـع الله واتــأمــل
يـــاقـــوّ دمـــعــــي ويـــاقــــوة مـعــانــاتــي
ويـاقـل حيـلـة فـــرح قـلـبـي لـيــا صـمّــل
مـايـاخـذ الا ثـوانــي فـــي كــنــف ذاتــــي
والحـزن عايـش بهـا مشكـور ومجمّـل
يـابـوصـلـة حـيـرتــي ويــــن اتـجـاهـاتــي
يمّـنـت خـطــوة مـسـيـري والـهـنـا شـمــل
مـاكـن طـعــم الـسـعـادة فـــي بـطـولاتـي
الا عــــروسٍ نــهــار الــعـــرس تـتــرمّــل
وش عـاد اسـوي وذيبـي مـاكـلٍ شـاتـي
وازريت لا احوشها عن بعض واتجمل
وشلـون قلبـي يعيـش بـحـس نبضـاتـي
والسـيـف لاراغ عــن عـرقــي ولا كـمــل
اصبـر ولا ادري وش يصـيـر بحكايـاتـي
والصبر لا اعمى عيون الادمـي ينمـل
مـا الـوم صـوت الألـم فـي نبـرة ابيـاتـي
لا صـار حبـل الرجـا ممسـوك ومهـمّـل
والـوقـت غيـمـه ســراب وراعــده عـاتـي
وانـا ماعـاد اقــدر اوجـاعـه ولا اتحـمـل