[الشاطئ المهجور]

لا ضاق صدرك وازعجتك الدواكيـك.
وقامت همومك وسط صدرك تزنّـا

استغفرالله عن خطـاك ومعاصيـك.
ليـن ان غيمـات القلـق ينجلنّـا

وانته وش اللي من هدومك مجزيـك .
تحمـد الله هـم غـيـرك مثـنـّا

تمشي على رجليـك والله معافيـك.
وغيرك على بيض السرايـر يونّـا

الله خلقـك وكافلـك مـا يخلـيـك.
يرزق خشـاش الأرض بجحورهنّـا

عش بس يومك وانبسط مع بني خيك.
ما فات مـات وباكـر يغيـب عنّـا

والناس لو تركض برجلك واياديـك.
كايـد رضاهـم كلـهـم لاتعـنـّا

اطلب رضا الله واترك الناس يرضيك .
وتمشي لـك الدنيـا علـى ماتمنـّا

وعن كثرة الروحات قصر خطاويـك.
والواجبـات اليـا بـدن لاتـونّـا

ولسانك حصانـك تفكـه يدهويـك.
ولاتسرج خيولك على حساب ظنّـا

و الهرج دامك ماسمعتـه باذانيـك.
لا جـاك منـا خلـه يـروح منّـا

والامر شاور به رفيق(ن) مصافيـك.
قـدام سفـن البـحـر لايبحـرنّـا

لو كان عرفك حسب ظنـك يقديـك.
يمكـن يشـوف أمـور ماشفتهنـا

ومن لايعرفك زين ينظـر مخاويـك.
يـوم الطيـور تطيـر لأشباههنّـا

إما امدحوك الناس لا حـل طاريـك.
و الا يـقــال الله لا يمـتـحـنّـا




منقولل

الموضوع الأصلي: استغفر الله عن خطاك ومعاصيك | | الكاتب: الشاطئ المهجور | | المصدر: شبكة بني عبس