يامن تقول إن العسر ماله فراج
بعض السوالف والله إن مالها وجه
حظك عزوبي وإنت قاعد ومحتاج
إنهض وخذ يد العزيمه وزوجه
رزق البحر وافر وهو ملح أجاج
وإسأل هل الدمام وإسأل هل الوجه
لذا زمانك لو يسبب لك إزعاج
حذراك تخلط عاقل الوقت وأهوجه
ماهو بسبة فرد تكرهلك أفواج
يامن زرع حبه بقلبي وروجه
الحب حاكم بس حاكم بلا تاج
والله ما غير المواصل يتوجه
أنا سريتك سرية مابها سراج
وعقبه عطيتك قلب للود ما أحوجه
البحر ماله صوت من دون الأمواج
والقلب بحره لج والبعد موجه
الا المحبه ما تبي رفعة حجاج
قد كان حبك سمح والكبر عوجه
حبيتك وعرضت قلبي للاحراج
ماتنعطى قلب ولا تنعطى وجه