[سعد بن عادي]

يا نجم يا ساري علـى مسـراي تكفـى لا تبـان
قّـل للظـلام يلبّـس الدنيـا عـبـاة ٍ ضافـيـه
مليت أشوفك ممتلي بالنـور و تضـيء المكـان
و نجوم صدري داخل أضلاعي حزينـه .. طافيـه
يا أبن الحلال.. أرجوك طف النور في دربي عشان
ما عاد أميـز فالوجيـه .. الخاينـه و الوافيـه
ليه أخسر اللي طاح من عيني او أكسب لي رهان؟
مـا عـاد تفـرق .. و النتايـج كلهـا متكافيـه
ما عاد أبي صدمات تحت اسم التجارب.. و أمتحان
واحـد كفيـل بتعريّـة كـل العلـوم الخافـيـه
الجرح واحد لو يجي .. من يد فلان او يـد فـلان
يتشابه الهافيـن .. فـي فعـل الأمـور الهافيـه
نفس الوجع/نفس الضما/نفس الخطا/نفس الجبـان
نفس السؤال .. و نفس اجابات الشهـود النافيـه
يا نجم خلك في محلـك مالـك و مـال الطمـان
أقلط على صدر المعالي .. صحتيـن و عافيـه !!
ما دام موتـك مستحيـل و فيـك للجـو اتـزان
لا تنـزل الـوادي و تضربـك الريـاح السافيـه
تدري لو أنك تسأل عيوني عن الحرمان .. كـان
تشرح لك الحرمان فـي نظـرة أجابـه شافيـه
حلمي كبير و سيدة حلمي مـن السحـر البيـان
ما جابها الواقع و لا جتني علـى ارضـه لافيـه
من وحي فكري صاغها الحرمان بعيونـي كيـان
أعيـش فيهـا و أحتـرق لسنينهـا المتقافـيـه
فأن كانها متفرده .. بأحساس و أوصاف و ليـان
قصيدتـي متفـرده .. معنـى و بحـر و قافيـه
بنت القصايد .. كل ما هب الهوى و الطـرق زان
غنيت فيهـا ليـن اصحـي كـل فكـره غافيـه
ما يكفـي انـي كـل مـا غنيتهـا ذاب اللسـان
كنه يقول ان السكـوت أحيـان حاجـه كافيـه!!
أحيان أخاف الموت بيديها و لا أشعر فـي أمـان
و أحيان أحب المـوت .. لكـن المنايـا جافيـه
ان سولفت في صدري الخايف من البرد أستعـان
فيها.. و قامـت بيـن ضلعينـه تمشـا حافيـه
فيها برود و ثلجها .. خلطة رحيـق و زعفـران
تحالفوا فيها علـى هيئـة ( عصابـة مافيـه )
هذا يجيد الفلسفـه .. و هـذا يجيـب الأحتقـان
و انا مع الأثنيـن نفسـي مـا تجـي متصافيـه
وش عاد باقي!! بنت عز/و بنت شيخ/و ذات شان
مثل البحر و امواجها بأسمـى المشاعـر زافيـه
قالت : اذا مات الدفا .. من يثبت ان البـرد خـان
في صحبته .. قاطعتها!!قلت : أسمعي يا وافيـه !
لولا الوفاء مات الدفا ..و اصبح يهون و يستهان
و أجراحنـا بأروحنـا صـارت مهـي متعافيـه
الشكر لو ماله وجود .. ان كان ما فيـه أمتنـان
وأكبر جفا .. وش ياسعه غير القلـوب الرافيـه؟
يا غاليه .. رغم الوجع رغم التعب رغم الزمـان
جيتك و قلبـي ينتظـر فرصـة حنـان موافيـه
حطيني بصدرك واذا قال الزمـان: أظهـر و بـان
خليني ابقى داخل ضلوعـك .. بخيـر و عافيـه
انتي عطيني من غلاك.. أحساس وشويّـة حنـان
وأعطيـك قلبـي.. والقلـوب أطباعهـا متنافيـه
تدرين لو كان الدفا دولـه و فيهـا .. برلمـان
!صرت الزعيم .. و قائد أحزاب القلـوب الدافيـه!
لا زلت عادي.. رغم كـل البهرجـه و الهيلمـان
صافي نوايا.. فـي زمـن مالـه نوايـا صافيـه
ما هو خطا لو نفترق .. و يذوب شمع و شمعدان
بس الخطـا لـو نجتمـع .. و قلوبنـا متجافيـه