يا سيد المها قلبُ خذيته بدون شعور=تحمل وكل ومل من سيرة الفرقا
جروحه دفينه والغلا داخله مستور=يجاهد جنودك في مداهيلك الحرقا
سبايب غيابك مدهلك غاب عنه النور=حروقه تفاقم منك يالجادل الطرقا
ولا ينفع الراقي ولا ينفع الدكتور=حروق الضماير لا تعالج ولا ترقا
ياليتك تخاف الله بالخاطر المكسور=توهم وجاوب باللحن نايح الورقا
لي أيام ما جفني بحلو الكرى مسرور=أساهر جروحي لين أشوف السماء زرقا
تسريني الذكرى على صاحبي مجبور=وهو عني أبعد من لقاء الغرب للشرقا
أكابر بصمتي والأمل شع بالديجور=تمثل سوات النجم له بالدجا برقا
رسمت أسمك بكبد السماء والغلا منشور=بعشرين نجمه كل مرقالها ترقا
وجاني خيالك يالغضي مع طلوع النور=وشفتك وكل الناس في نومها غرقا
وذا كان شوفك حلم يا جعلني ما جور=بحالً غدت بدراكها سيرة الفرقا
منصور بن عيد بن صبح الرشيدي