السلام عليكم
أقدم لكم قصيدة جديدة بعنوان((دق ناقوس الخطر))
يطري على بالي وأعيد التفاكير=وأرد غارات الطواري بغاره
أن أقبلت بالخير تقفي على خير=وأن أقبلت بالشر تقفي شراره
تشب نارٍ كبر أبانات والنير=نارٍ وهجها زمهرير وحراره
نارٍ تقفاها هبوب المعاصير=وعلى الطويله تستدير استداره
عسى هل الفتنه عليها مقاهير=وتحصي مساكنهم عماره عماره
ويخيب ظن أبليس في نافخ الكير=وتموت هقواته مثل موت ناره
ياضعيف الحيلة رمتك المقادير=لاتحسب أنك معتلي فالصداره
هافي ولايتبعك غير المخاسير=ياملهي وجيه الندم والخساره
تبعٍ على الزله تسوق التباشير=وأن شفت طيب يصيب كبدك مراره
أنسان لاكنّك على شكل خنزير=ولله ربي حكمةٍ بختياره
ماتفعل فعول الرجال المناعير=وعندك على فعل الخساسه شطاره
مركوب شيطاني وشرٍ وتشرير=وعند النوايب والنشب فيك باره
أخذت من وزن الردى حملة بعير=ثم جبت راسه والسنام وفقاره
بتعيش في همك سنينٍ معاسير=وبتموت في ذله وضيم وحقاره
والعاقبه للحق مافيه تبرير=لوصرت بالباطل وزير الوزاره
مايدحم الجمع ويشق الطوابير=ألا شجاعٍ صملته من نعاره