كل ماذعذع هوى الغربي طرالي مانسيته=والسبايب ساعة الفرقا ولحظات الوداعي
المشاعر تحيي الجرح القديم ولاتميته=والثقه فالنفس يهدمها المجي والأنقطاعي
يالله أنك لاتواخذني على ذنبٍ جنيته=المعاصي تعمي القلب وتحدك للضياعي
مابقا شيٍ على الدنيا ظنوني محتريته=غير عفوك ياكريمٍ تستجيب لكل داعي
شلت من جور الليالي ماتحملت وقويته=وأتصبر مثل كل الناس وأمر الله مطاعي
دام رزقي مايضيع ورزق غيري ماخذيته=ماعليه لوتخطفني مخاليب السباعي
صاحبي كانه على الطرقه عزومه مستميته=الدروب اللي تفرقنا وتجمعنا وساعي
أن بداله لازمٍ عندي بلا منّه قضيته=مانقول الحق والمعروف بين الناس ضاعي
كم رفيقٍ يطلق حجاجك ليا منك نصيته=كان ماسوى جميل يعلمك خير المساعي
لي معه حبلٍ عن العد الرهاوي ماطويته=يجمع الطيب مع أهل الطيب قدر المستطاعي
والردي في ذمتي ماسوق رجلي يم بيته=والليالي معطيتني عنه فكره وأنطباعي
علمتني تالي الأيام شيٍ ماقريته=في كتاب الفلسفه وكتاب علم الأجتماعي
من يعيش العمر لابده يلاقي مالقيته=ويتواجه مع حصيله يوم تنعاه النواعي
عبدالهادي بن صبح