مبروك يالبيطار والفين مبروك=من خاطر ٍ فرحان رغم البلاوي
قريت لي نص ٍ ولا فيه مشكوك=وازريت لا افك العقد يالمداوي
الله يبارك فيك وانتـه ياصعلـوك=تستاهـل التعييـن لشعـر راوي
النص ماثبت على بند وصكـوك=ولا افتى به اللي يصدرون الفتاوي
ابقار لكن دونها باب مصكوك = من جوعها تبغى تقض العراوي
وانته لا طبيت المداين ينادوك = يا قايد الشعار قربك مناوي
من ما حمد للعافيه يأكل الشوك=حتى يميز بالحيـل والهـزاوي
اعدائي ابكفي ترى احوكهم حوك=وما اصادق الا مبعدين الهقاوي
اليوم سبع اسنين بالخير طروك=سبعه وسبعه عندكم كم تساوي
الحر فالديره غدى عبد مملوك=ولا عاد ينفع فيه كثر الرجاوي
درب الفخر بالعز والطيب مسلوك=واترفرف الأعلام قبل العـزاوي
نجد المسمى غير عن دار كركوك=وشيوخنا مايشبهـون الشـواوي
يا اهل العقار اللي يغطي على بنوك=يا كيف فالميقاف صاحت مضاوي
من يسترق للسمع بالشر مشبـوك=ويجيه من بطن السماء نجم هاوي
نصرف ذهب قدام لا نطلع البوك=حلالنا مكسب ولاهـو رشـاوي
اعوذ بالله من شياطين هنكـوك=اللي يخمونه يطيـح امتسـاوي
دام الجمل مربوط ما هو بمفكـوك=خلك تمشى فـي ديـار الخـلاوي
وان طالت المده والا صحاب مروك=تدري بأن الجـرح مالـه مـداوي
عزالله انه دك بالصدر داكوك=من بعد حل الفقر عند الغناوي
احذر من اللي للمقاشر يدفوك=ياصاحبي لاتصير بالحيل غاوي