من أحب قصااائده الي قلبي
يابو محمد جيت وبالقلب لاهوب
أبشتكي ياخوي من قبل لا شيب
أخوك من حبه غدى اليوم مغلوب
و حدّه غرامه يم شعر ومكاتيب
طحت بغرام غزيل(ن) شارد لعوب
تاخذ عقول وتاخذ قلوب ولا تجيب
اللي غلبتني دون تخطيط وحروب
وشقت خفوقي ودخلت دون تطبيب
غزالة(ن) لا شفتها كلي أذوب
كم أحرمتني نومتي صبح ومغيب
غزالة(ن) فدوه لها أرواح وشعوب
هيّبت لجل عيونها روس ماتهيب
ماتلني من قبلها عشق وقلوب
رغم إن قلبي آسر(ن) ميّة قليب
ماشفت من هو مثلها بزين الأسلوب
متفرده بالزين من دون تشويب
ماخالطتها لا عذاريب وعيوب
مكمله والكامل الله عن العيب
أسج رجلي لا طرت لي على دروب
وأجر ونه بالضلوع المعاطيب
اللي لجسمي صارت أقرب من الثوب
وهي أبعد من اللي عوى دونه الذيب
لا هي بتحصل لي ولا منها مهروب
وجرح الهوى ياخوك ماظني يطيب
ياليت حظي ينعدل بالدهر نوب
وتصير طول العمر لي حل وقريب
معروفة بالزين من مجمل شعوب
كل الملا من تحتها بالتراتيب
من لابة(ن) ماطالهم أي عذروب
شجعان وشيوخ وفعايلهم الطيب
من حبها لا طاب لي زاد ومشروب
وجسمي نحل والعقل رايح تناهيب
ماأنساها دام القلب بالحب مسلوب
ودام المسا والصبح يمشن تعاقيب
ودام البحر بالموج ضارب ومضروب
ودام الشروق لشمسنا ماهو مغيب
هذا عهد مني إلى الموت ما أتوب
عن حبها دام النسا تحمل وتجيب
أيام لاتنسي وسجل ياتاريخ