[محمد بن شويلع]

إهداء إلى الشيخ سليمان عبدالله بن شويلع الرشيدي وهي قليل من كثير بمقام الشيخ سليمان وقبيلته العزيزة ولن يستطيع الشعر والشعراء الوفاء بمدحهم لتعدد مزايا الطيب والوفاء بالشيخ سليمان وقبيلته بني رشيد العريقة.

جتني هدية من سليمان مهداه = بكرة من أبكار الشيوخ الاصايل
لاهي جزاء معطاء مقدم ولا جاه = مدة كريم اليا كرم ما يسايل
مدة كريماً تنثر الجود يمناه = شيخاً على كل المواقيف طايل
سليمان راع الطيب والطيب يزهاه = ساس الكرم والجود دل ودلايل
الطيب من خاله وعمه ومجناه = وأبوه زيزوم الحمول الثقايل
أبوه عبدالله له النعم مثناه = زبن الدخيل اللي بلي بالوحايل
من ساس قوماً توصل العلم منهاه = صقور عبس اهل النقاء والفعايل
ذرى العواني عبس والجار وحماه = وذرى حدود الدار عن كل عايل
ان جاء نهار أسود وحطت رزاياه = للحرب خلوها شبوب وفتايل
يوم انها بالفعل والسيف وشباه = فرسان عبس مرملين الحلايل
عدوهم يلحق على مقيط ورشاه = يذوق مشروب النكد والغلايل
يجلس عشاء شهب الذيابه تعشاه = تحت حوافر خيلهم دم سايل
واللي هقى يقصر عن اللي تهقواه = بحد السيوف المرهفات الصقايل
بني رشيد اهل الوفاء بالمجازاه = بافعالهم حازوا جزيل الخصايل
الطيب يجزاء طيب راعيه يلقاه = ومن عال يجزاء بعيلته كل عايل
الشخص من عبس والوفاء من مزاياه = بكل المواقف له عزوم وصمايل
هذي حقايق والمشاعر معفاه = عن كل زيف وهرج ماله حصايل
ان الرشيدي عز والعز ممشاه = له الفخر بالعز بين القبايل
عبس العريقه مجدها ماحصيناه = مجد ارتكز في عبس روس الحمايل

الشاعر : سلامه بن سعد مزعل الجهني

حررت القصيدة بتاريخ 3/3/1433هـ

الموضوع الأصلي: إهداء إلى الشيخ سليمان عبدالله بن شويلع من الشاعر سلامة سعد الجهني | | الكاتب: محمد بن شويلع | | المصدر: شبكة بني عبس