[عطر الاوركيد]

صار ياما صار في ليله مثيره للنحيب
وانا انفث أحزاني على ضفّه نفاها العابرين


ضجّ المكان وارتفع صوت الأغاني والغريب
ما اشوف الا واحدٍ بيني وبينه خطوتين


ومايشبه الا فارسٍ كنت أحلم انه لي حبيب
تبسم وقال انتي واضح للبحر دايم تجين


وملامحك تشبه لطفله ضايعه وقت المغيب
وكنّ الهدب يمطر عطش من غيمة أحلام السنين


وأنا رسول الفرْح جيتك من سماوات النصيب
ابقتل همومك وأعوّض كل ماضيك الحزين


قلت البحر يشعر بي أكثر من بشر كانوا قريب
هو جنّة العشاق والمنفى لكل المتعبين


اجيه لامن صرت محتاجه أفضفض أو اغيب
عن واقعٍ فيه الحياه أشبه بحال الميتين


قال انظري ياطفلتي موج البحر كنّه لهيب
ابيك مثله لو يبللك التعب ماتنطفين


مثيره الليله وابي منّك طلب ماهو صعيب
قومي على رمل الفرح ودّي أشوفك تلعبين


فزّيت وطاح الكاس ينذرني إلى وعيي انيب
لا فارس ولا به أحد غيري أنا والشمعتين


نفثت حزني للسما وهلّت تقاسمني النحيب
ورجعت اجرّ خطاي في دربٍ نفاه العابرين ن ن.!
..,’