[سعد بن عادي]

حسبي على الشعر نوب و نوب حسبي له

نـوبٍ يخفـف علـي ونـوب يجرحنـي

لـولاي احبـه وفـي صـدري مداهيلـه

ماسقـت همـي عليـه ابيـه يشرحنـي

عسانـي اخطـي رداه وهزلـه وميلـه

واصيـب شـيءٍ اذا قلـتـه يربحـنـي

والله يسامـح خطـاه وسـوء تأويـلـه

وانـا علـى زلتـي ربـي يسامحـنـي

النـاس كـل ٍ علـى همـه يغنـي لـه

وغنيت لأصغر همومي وانكسـر لحنـي

ياصاحبـي صاحبـك كثـرت غرابيـلـه

ولا بـه الا انـت يشعربـي ويلمحـنـي

وين انت ياأعذب مـن الغيـم وهماليلـه

ياللي ليـا مـر لـك طـاري يفرحنـي

جاد بَك كف الزمـان وشـح مـن ليلـه

شف كيـف الايـام ماتبغـى تريحنـي !!

وشلون ابنسـاه وانـا اصغـر تفاصيلـه

تسر حالي ولـو حـال الزمـن محنـي

صوته ...وضحكه...حور عينه ...مظاليله

صباح وجهه عسـى وجهـه يصبحنـي

ربكة يدينه ...شـذى عطـره ومنديلـه

برأتـه ...طيشـه ان حـاول يمازحنـي

اجيه ....واوقف ...واروح القاني اجي له

واضيق وأرضى ولا ادري من مصالحنـي

ادل كـل الـدروب اللـي تـودي لــه

وتردنـي عزتـي والشـوق ذابحنـي !!!

ياكثر حزنـي عليـه وكبـر حبـي لـه

وياطول صبري وانا اللي صدق جارحنـي

يااطهر من الغيم .. وأعذب من هماليلـه

ياللي ليـا مـر ّ لـك طـاري يفرحنـي

ِأخطيت انا وانت نفس (الجـرح والليلـه)

وسامحـك قلبـي وعيـا لا يسامحنـي!