[سعد بن عادي]

على باب الامل واقـف وادور للشعـور دروب
ولا حصلّت غير الشعر يجرد عهدة لسانـي !
احس بحال وأشعر بأن قلبـي لاكتبـت يـذوب
ولاأدري وين وديته ولا أدري ويـن ودانـي !
ذكرت الذكريات وقلت وقتي لو يجـي مقلـوب
بوقف فـي طريـق الذكريـات ولا تعدانـي !
لكن اللي حصل مكتوب ، واللي ماحصل مكتوب
وعسى اللي راح يفدا اللي تمنيتـه ويفدانـي !
مثل مالي من الآمال .. لي بين القلوب قلـوب
تمنى فرحتي وتـدور اللـي يبعـد احزانـي !
وفيها قلب ينبض لي وحتى نبضتـه بأسلـوب
ولو قلت اترك الدنيا قطع نبضه على شانـي !
ابادله الغرام وخاطري فـي غيبتـه مسلـوب
وأذا عوّد تقول الحظ باللـي فاتنـي .. جانـي
تسميه الليالي واسمه اللي يخصني محجـوب
وهو عكس اسمه الاول ويشبه لأسمه الثاني !