بعد قلبي نضج .. وأصبح دليلي بين ذيك وذيك
دهاليز النواعم لو تشوقـه مـا دخـل فيهـا
يعرف أنواعهن وأطباعهن .. سم ّ وهلا لبيّـك
ويـا كثـر العيـون اللـي يكحّلهـا ويعميهـا
قضا من لعبة ٍ بالغـش والتخطيـط والتكتيـك
تخمّ قلوب وتـروّح بهـا .. وقلـوب تخطيهـا
تعلّم والتجـارب خلّتـه يبعـد عـن التشكيـك
كسب له خبرة ٍ تآخـذ مـن الدنيـا وتعطيهـا
علاقات المصالح لو تحطّ الشيك فوق الشيـك
تجيهـا ساعـة ٍ لا بـدّ مـا تهـدم مبانيهـا
ليا هبّ الهوى قام النحل بين العسـل والكيـك
يشيل مـن الحـلاوه والمـراره مـا يحليّهـا
عساك بخير يا القلب المخضـرم والله يهنيّـك
قوانين المحبّـه مـا تغـرّك وأنـت راعيهـا
ألا يا حبّ يا اللي بان نورك .. ما سرا ساريك
رعاك الله مـن أوّل سيـرة العاشـق لتاليهـا
أعيشك وأتعايش معك وأحيا فيك ليـن أحييـك
حفظتك عن ملاقيـف العبـاد وعـن بلاويهـا
عن أذنك يا حبيبي يوم أغنـيّ وأتغـزّل فيـك
عسى دقّات قلبـي كـل مـا غنيّـت توحيهـا
أنا عندي مشاعر شاعر وترضينـي وترضيـك
لكنّ المشكلـه وشلـون ألحنّهـا وأغنيّهـا ؟
ثلاث سنين مدري من كثر ما أغليك وين أغديك
ليـا دسيّتـك بعينـي سـرا قلبـي يناجيهـا
أبيع المترفات اللي ترفهـن ينشـرا وأشريـك
بنات الناس فدوة حضرتك عـن بكـرة أبيهـا
عليك القلب مقفول ولا يفتح غير مـع طاريـك
ليا جتني طيوفـك قامـت ضلوعـي تحييهـا
أحبك .. والمحبّه هكذا وأهـل المحبّـه هيـك
تعيش ولو يجور الوقت مـا يخلـف هقاويهـا