[غربة الروح !!]

افتح شبابيك الهوى جيتك اليوم
بأحساس من زود الوله عنده يطير


جيتك مثل طفلٍ له ايام محروم
عن حضن أمه أبعدته المقادير


وجيتك مثل عودٍ له أيام مهموم
وده يلاقي بأخر الوقت تقدير


وجيتك بحضن عاشق وهايم ومغروم
وده يضمك لين تصبح على خير


متى تحس إن الهوى شي مقسوم
من قسمه الخالق على خلقه يصير


ومتى تحس إني لك أطيح وأقوم
وأتعب على شانك وأقدرك وأغير


لي في هواك أحلام وآمال وعلوم
وأحزاب وأصحاب وقصيد وجماهير


وهموم وأفكار وهواجيس وحلوم
ودروب وأخطار وعذاب ومشاوير


وحب وغلا وإخلاص ومعاند ولوم
وإحساس وإلهام وشعور وتفاكير


وصحبه وسهر ومقاطعه لذه النوم
وأشواق جياشه وعشق وتعابير


في ذمتك مابان لك شي مكتوم؟
من بعد ماصورت الأوضاع تصوير!


لاتحسب إنك شي عابر ومعدوم
وتاريخ حبك فاق كل الأساطير


في كل شي أتخيلك وأسمعك دوم
وأتاملك في الوقت الأول والأخير