على جديد الشوق سجل حضوري
وعلى قديم العهد ياسيدي جيت
احيان تلقاني وتفقد شعوري
وتحس فيني حي واشابه الميت
واحيان تلمس بالمعاني سروري
واشابه احساسي اذا قلت لي بيت
شاعر لقى بستان مزروع جوري
وين التفت ما شاف غيره منابيت
قال لبنات افكار معناه شوري
قالن لقيت اللي طلبت وتمنيت
فرصه وجاتك واغتنمها ضروري
وارفع يدك بالحمد للي حمى البيت
قلت البلا جوه ايخربط اموري
نسيت كل اللي جمعت وتطريت
هبت شذى عطره وضاعت عطوري
وطلبت يالله ثبت القلب تثبيت
بجمع بقايا الفكر وابني جسوري
وباخذ من البستان صوره بتوقيت
ما كل وصف القاه يرضي غروري
ونا الذي بابداع فكري تقهويت
وعندي من الإبداع اغلا تجوري
مخزونه اللولو وماس ويواقيت
ياحارس البستان ولم فطوري
الحين بس الحين تو استقريت
ان كان مابيّنت لحان دوري
اطفيت واهج جمرتي ما تدفيت
وان ما ضوى ليله من اشعاع نوري
لاعاد يفتح بابه ان كان مريت
انا القديم اللي تحرى ظهوري
وعلى جديد الحان لقياه غنيت
في ساحته جبّرت اكبر كسوري
وقمت اتمشا بالقدم ما تثنيت
ماظن ينساني وينكر حضوري
وماظنني بنساه لو له تناسيت