يا مشير القلب عن داعـي غرامـه
خل قلبي فـي غرامـه لا تشيـره
أتركه ما يجهـل الحـب ونظامـه
لا تعدّه ضمـن عميـان البصيـره
له من الخبره ما يحفظ لـه مقامـه
وارث ٍ له من سلوكه حسن سيـره
لا تـراود شفـه وغايـة مرامـه
الهبايـب لـو تمـرّه مـا تثـيـره
فوق غصنه حطّ .. عصفور وحمامه
وغرّد الأوّل علـى نـوح الأخيـره
لو مراده قمـزه وغمـزه وشامـه
كان شفته يومي لموكـب سميـره
فيه غير اللي علـى خـدّه علامـه
واحـد ٍ عنـدي علاماتـه كثيـره
النزاهـه والوجاهـه والفهـامـه
والنبا الجـذّاب والنفـس الستيـره
سمعته تفرض على الناس إحترامه
ما رماهـا فـالرحـاه المستديـره
ولا يحسب حساب لبّـاس العمامـه
لو لبسها شيخ شيخـان العشيـره
أستلم قلبي ومـن يـوم إستلامـه
ما تولاّ عرش قلبـي حـيّ غيـره
كمّ يذوّبنـي علـى زبـدة كلامـه
بالنقاش اللي علـى كيفـه يديـره
بينـي وبينـه مشاريـه وملامـه
ودمعتين بعين شوق .. وعين غيره
لـو يقابلنـي بضحكـه وإبتسامـه
هب في صدري هواه وطـار طيـره
جرّ فكري عقب ما حزت إهتمامـه
بالطواريـق الطويلـه والقصـيـره
قلت أحبك .. قال حبّي لـي علامـه
قام يكبر ؟ قلت مدري .. قال خيره !
كلّ منّـا لـو يعبـرّ عـن هيامـه
تقصر علومه عن اللي في ضميـره
والطيـوف اللـي تبلّغنـي سلامـه
مادرت قلبـي بفقـده وش مصيـره
جعل ربـي مـا يذوّقنـي خصامـه
شاري ٍ وصله على شـرّه وخيـره
يا زعيم الوجـد تزهـاك الزعامـه
سير بي والله يصون أحلى مسيـره
هكـذا حـب ٍ تغـذيّـه الكـرامـه
أفتخر به وأذكـره فـي كـل ديـره
العلم رفـرف علـى ذروة سنامـه
أتركوا قلبي ما يسمع مـن يشيـره
ما لحقني لوم من قصـة غرامـه
لو تبثّه نشـرة أخبـار الجزيـره !