تعال واحيي العروق الذابلات الهميد
انعش حنايا الضلوع اللي عوى ذيبها
لو غربة الشوق طالت شاب حرف القصيد
والروح شوفك وقربك هي مطاليبها
روحي وقلبي ضيوفك يالغزال الشريد
وضيوف الاحباب في حكمة معازيبها
ذابت عليك المشاعر بين قاف ووريد
ونور السعادة طفى .. توحش سراديبها
العمر تنقص سنينه وانت حبك يزيد
واحلام عمري معك تقبل وتقفي بها
غربة زماني حزينة والمواصيل عيد
وسود الليالي ترى الفرقا عذاريبها
صدق الليالي عنيدة مير راسي عنيد
والله ماآذل نفسي ... في هناديبها
[ياليل دوك العذاب وهات صبحٍ جديد]
تعبت آعدي واحوّل من مراقيبها
ماكل حيٍ تمنى يوصل اللي يريد
متى الليالي معك تصفي مشاريبها
يامنتحي عن عيوني منك وش استفيد
تعال ضم الضلوع اللي عوى ذيبها