.
رفقة ردي الفعل همٍ على هم
اتلا تلاياها تعوّد مذمه
.
تحس خاطر طيّب الساس ويغم
ويبين لك ما هو وراء الأكمه
.
ترى الرفاقة كيف ما هيب بالكم
رفقة وفيٍ خير من ثلث الأمه
.
ما كل من جاوب صدى صوتك بسم
يغليك ولا أنك حقيقة تهمه
.
من لا يودك لا توده فتندم
جنِّب وخل النذل في مجلس أمه
.
من نم لك عند المخاليق بك نم
وركّبك عيبٍ منت حوله ويمه
.
ايه الرجال أجساد وهموم وهمم
وباقي العباد بحسب نظرتك سمه
.
والورد لا ما قيمته بس بالشم
ولا يمدح الرجال في فعل عمه
.
كم ضاحكٍ يضحك وفي جوفه السم
وليا بحثت أقصاه شفت المطمه
.
أول إذا ينخاك تممت له تم
تبذل له المجهود شرقٍ ويمه
.
وليا عرفته لا جلس قلت له قم
دوّر وتلقى لك من الخلق رمه
.
ما دام وجهه بالحيا ما حوى دم
فرقاه تشبه ديمة المدلهمه
.
عرف الردي لو هو أخو أو ولد عم
نقص ولا ينفعك عند الملمه
.
رافق عريبٍ عن هل الناقصة زم
حرٍ مداهيله على راس قمه
..
.
اسم القصيده وقائلها :
" الصداقه "
للشاعر // عبدالعزيز الشهيل
.