طوّلت بـي ياصمـت .. ماحـرّرت قافـي للكـلام=وارغمت هاجوسي .. يفك القـاف مـن زنزانتـه
ماللقلـم عـذر يتعـذّر بـه ، ليـا حـلّ الظـلام=من حول قلـبٍ ..لفّـت عروقـه علـى ريحانتـه
شاعر ، لساني ساحر ، ويِخرج من ظلوعي حمـام=ويقدر يخلّي البحر الاحمر .. يختفـي فـي دانتـه
ويزرع على الصحرا نهر .. ويصيد لاحلامي غمام=ويـردّ سهـمٍ متجـه صـوب الرضـا ..بكنانتـه
لو كان ماهو هـمّ ..اسـوّي منـه فالدنيـا زحـام=وهبـة كـلام ..الله وهبنـي خـوخـه ورمّانـتـه
لي قيمتي .. بين الرجـال اهـل الوفـا والاحتـرام=ولاّ الـردي .. مـاامـرّ سـردابـه ولا دكّانـتـه
لاصار .. لاسيفٍ يمارى بـه ، ولاصفـرة حـزام=مغنينـي الله .. عـن سواليفـه وكثـر ميانـتـه
الاّ قبل مايخرج الموضوع .. عـن صلـب المـرام=شـدّ الرسـن يافـارسٍ زاد السمـا .. طعّانـتـه
مظطر امرّ بديرة الذكرى .. علـى ظهـر المـلام=لـو انّ ، مـاودي بسجـنٍ مـارحـم سجّانـتـه
فيه الحيـاه .. اشبـه بغابـه جمّعـت أسـد وأرام=وقالت لهم : عيشوا ، ولااحدٍ يلتـزم فـي خانتـه
في ذمّة الريم اربعـه .. بيـن الصداقـه والهيـام=وفي ذمّة الجارح .. ثمان اخوَن من اللـي خانتـه
وفي ذمتي ، ب(انّ) الهوى اللي خارج اسوار النظام=ذنـبٍ كبيـر ، يزحـزح الرجّـال عـن مكانـتـه
وش فاالغرام ! الا العنا ، لاعـادت دروب الغـرام=ضايـع ، يبشـر ضايـعٍ ثانـي ..بجـرح ديانتـه
فـلان الفلانـي .. ودّه فلانـه ، وفلتانـه تـمـام=وافلانـه.. اتخطّـط علـى فلتـان ، قبـل فلانتـه
يارب عفـوك .. ياعفـوّ ، ويارحيـم ، وياسـلام=واعوذ بك ، من شـر شيطـان الهـوى واهانتـه
أمّـا بعـد ، ياسيّـده .. بيـن السجـن والاتهـام=المتهـم ، بــريء حـتـى تثبتـيـن ادانـتـه
ماكـل مايُكتـب بصفحـة سبـق ، ولاّ فالـوئـام=خبر صحيح ! ، وكم خبر يضحـك علـى عيّانتـه
والعلم فيـه (انَّ) ، و(إنَّ) زاد فـي خِـرج اللئـام=واللؤم ، اموت ولايعيـش القلـب تحـت اعانتـه
يمكن .. تبين تحرّكين المـا علـى جـال الخصـام=وحجَـرك ، يلقـى فالدوايـر مايطـش خيانـتـه
ويمكن ..لأن الله خلق بعض القلـوب مـن انتقـام=وش ذنبه اللي راحـلٍ .. مـن طيشـه لرزانتـه!
ويمكن .. كلامك صح ، واللي قاتلـك بيـن الأنـام=لكن عروقك .. ماعـد تميّـز مـن اللـي عانتـه
ويمكن ويمكن ..ياكثـر يمكـن ، وياكثـر الكـلام=ياهاجسـي مشكـور ، ردّ القـاف فـي زنزانتـه