[سعد بن عادي]

بين الرجا ، والياس ، والممكن ، وشبه المستحيل
شحّ الصبر ، والصدر خانتـه الغصـون الذاويـه
نصفي رغم مااشوف حيّ ، ونصفي الباقي قتيـل
وانا اترنّـح .. فـوق دقّـات القلـوب الغاويـه
والحرب مابيني وبيني ..شعله ، ونـار ، وفتيـل
اضويّ اللي سارحه .. واسـرّح اللـي ضاويـه
كان الأمل ..ناوي يعشّبنـي ، ويزرعنـي نخيـل
ماكان يدري عن ظروف الوقت .. وش هي ناويه!
والحظ ، لا شاف الغصون المثمره حولـي تميـل
يقـوم يهـدم جمّـة البيـر ..ويشـق الراويـه
ويلاه ، ياليلٍ علـى صـدري ..يحـط ولايشيـل
لين الجروح استلهمت..صـوت الذيـاب العاويـه
والليل غدرا ، والزمن دوّار ، والمسـرى طويـل
وانـا ، تعبـت امـرّ بـدروب النجـوم الهاويـه
لو انّ متني .. ماخلـق ياغيـر للحمـل الثقيـل
لكنّ بعض احيان ..يحشرني الزمـن فـي زاويـه