لاصرت محتاج النصيحه لجل تنهـي المشكلـه
لا تستمع للي غرق تحـت المشاكـل ليـن مـل
لو هو صحيح انه يفيـد اللـي يشـور و يسألـه
كان استطاع انه يشـوف لمشكلاتـه كـود حـل
التجربه اللي تعتمد في خـوض عمـق المسألـه
من خبرته يقدر يغيّـر عـن مسـارٍ فيـه غـل
وش جاب راعي الكهربا صوب الذهب والبوصله
كلّ ٍ حسب سير اختصاصه يعرف اللي فيـه زل
من باب فـرق المستـوى كـلّ ٍ تحـدد منزلـه
الناس معدنها تفـاوت نـاس زاد و نـاس قـل
لا تنتظـر فزعـة ردي النفـس وقـت البلبلـه
ولا تلتفـت للـي عطـا ثـم فالهدايـا عـاد ذل
وان شفت حاجه تزعجك انهي القلق مـن اولـه
فجأه تلاقي لك ضرر ما يندرى مـن ويـن هـل
خلك سخي واحسب حسابـك للسنيـن المقبلـه
من عاش في وحل البخل مات بفقر والمـال ول
الواعي اللـي منتبـه هـو مـن بنـى مستقبلـه
مهما ظروفه عكرت في صحوة الاحـلام ضـل
ماهوب عيب و لا خطا نسـأل سـؤال ٍ نجهلـه
لك بالذي ضيّع طريق السيـر ثـم بالشـور دل
يا صاحبي وان بهذلـك فالحـل بُعـد المشكلـه
اعرف ترى قد قيل ما به مشكله من غيـر حـل
اصبر على ضيم الزمان اللي طغـى و اتحملـه
اليوم الاقشر عاند اللي من جحود الوقـت كـل