علـى الله يامشاويـر الضيـاع وعثـرة الاقــدام
يعين الله علـى عـوج الـدروب وباقـي ايامـي
على الله كـل ماشـان الزمـان وخانـت الايـام
على الله كـل مااشـوف الطريـق يظيـق قدامـي
على الله كل ماصـدري يظيـق وخاطـري ينظـام
على الله.. كل ليله حزنهـا يعـزف علـى انغامـي
مقـدر ياشقـا عمـري اسيـر برحلـة الاعــدام
واضم بداخلـي نـار الخفـوق وجمرهـا حامـي
حزين.. ولامعي غير الجرووح.. ولوعـة الاعـوام
على وجهي تقاسيـم الضيـاع ..ونكبـة اعوامـي
حياتي كلها رحلـة غمـوض .. ونقطـة استفهـام
طلاسـم خطهـا كـف الزمـان.. لعثـرة اقدامـي
بقالـي مـن مسافـات السنيـن المقفيـات حطـام
بقايـا امنيـات.. وحسرتيـن "بسلـة حطـامـي
بقايا طفل رافقـه الشقـا مـن يـوم عمـره عـام
تحدتـه الليالـي والظـروف وعـاش منظـامـي
غرير ٍ لاكسا الكون الظلام.. اطفا السـراج ونـام
وصحى يحلم متى اكبر.. كبر ابوي.. وباقي اعمامي
عنيد.. ليا زعل شق الكتـاب.. وكسـر المرسـام
وجلس يصرخ عبث وين الكتاب ووين مرسامي
شجاع ٍ مارضى يصبح ذليل ولارضى ينظـام
رغم "كبر الظروف" وصغر سنـه "موقفـه سامـي"
قدر يرسم بصفحة دفتره (قلب ) و (وطن) و (اعلام)
وكتب فوق العلم [عاش الوطن فـي ظـل حكامـي]
حفظ من ربـك؟ الله لاسـواه!! ودينـك؟ الاسـلام
ونبيـك؟ هـو رسـول الله محمـد خيـر الانامـي
يمـر العمـر وتـمـر السنـيـن برحـلـه الآلآم
وجروحي تشرب اوجاع العـذاب وخافقـي ظامـي
كبرت .. وكبر همي .. والجروح وكبرت الاحـلام
وطموحي هو طموحي يازمـن واوهامـي اوهامـي
نسف كف القدر رجم الطمـوح وبعثـر الاوهـاااام
وتلاشت مابقى غيـر القصيـد .. وجـرة اقلامـي
،
،
عادل الذيابي