طال الطويل وقام يرهقني الطول
والنفس طول الوقت يخلف سنعها
اكنى واخاف اقول يحرجني القول
الناس ماترحم والايام معها
آخذ واعود له على داير الحول
مع سكةٍ ماكل طرقي قطعها
بيني وبينه باب ماهوب مقفول
واهل الولع ماتنتهي عن ولعها
حتى ولو اني مع الوقت مشغول
القى طريقة واضحه واتبعها
ماعاد لي قوة ولا عاد لي حول
في غبةٍ ماكل سابح شرعها
صحيح كلٍ له من العقل معقول
وكل يحصد البذرة اللي زرعها
كنت احسب ان الوضع هيّن ومحلول
واثر البلاوي كلبوها جمعها
يارب انا سايلك ياخير ماسول
المشكلة فيني تزايد وجعها
محد درى غيرك ولاشافني زول
ولا احد بعارف شكلها لو رمعها
ياناس خلوني مع النفس معزول
ماعاد باقي سالفة نخترعها
اباقضي ايامي بعيدٍ عن الضول
واخلي البدعه لمنهو بدعها
مالي ومال اللي غير مدلول
يتعب على الصنعه وهو ماصنعها
ومع ساقته دقوا مزامير وطبول
(أحدٍ شبرها شبر واحدٍ ذرعها)
واهل السلع صارو كما السيف مسلول
نموت والا نشتري من سلعها
وحده من الثتين والشخص مجبول
على البسيطة والبساطه تبعها
ماهيب لحية حرب وجيوش وخيول
الامر هيّن كان ربي منعها
تمت وانا قلبي من الهم معلول
وكم واحدٍ قدمي لقيته بلعها